潮流興瘦身，好多市民都想自己身形苗條，同肥肉講拜拜，不過凡事都有例外嘅。好似港鐵咁，年年賺過百億元，本來已經肥到連襪都着唔落，仲要猛咁吸啜民脂民膏，唔怪得淪為一隻癡肥怪物，搞到怨聲四起喇。
嗱，港鐵由尋日起加價，平均加幅百分之二點六五，加價後所有本地車程八達通最多加五毫，近八成加三毫或以下，月票每張亦加十元至十五元，港鐵都會票就每張加十五元至四百二十五元。票價加咗，優惠反而少咗，同日推出嘅第二程九折優惠只維持四個月至十月底，比去年減少一個月，即係食水又深啲。今次已經係港鐵連續第七年按照可加可減機制加價，預計可以帶來數億元票務收入，都咪話唔和味。
不過消費者就慘咯，荷包又要出血，傷上加傷。現時經濟吹寒風，裁員減薪潮一浪接一浪，升斗市民本來已經要勒緊褲頭過日子，港鐵加價吹起加風，更係百上加斤，條褲頭帶又要勒得緊啲。咪以為每程加幾毫子冇相干吖，小數怕長計，有乘客係咁講嘅，反對港鐵喺經濟不景氣下依然企硬加價，但知道無法改變呢個殘酷現實，希望港府成立票價基金，將多收嘅票價回饋社會。
但嘥氣喇，港產官僚有名麻木不仁，唔止唔體恤民生疾苦，反而話「港鐵加價係香港嘅福氣」，照咁嘅混帳邏輯，好似加價幅度愈大，市民愈幸福添，簡直不知所謂。最好笑嘅係，「好打得」嘅政務司司長林鄭月娥仲要惺惺作態，早前將港鐵、領展、強積金對沖機制列為港府施政嘅三座大山，話要出招對付喎。
冇錯，港鐵的確係三座施政大山之一，但究竟係邊個造成嘅呢？咪係港府自己囉，身為最大股東兼監管者，居然任由港鐵喺賺大錢下年年加價，唔係罪魁禍首又係乜吖？最簡單，票價可加可減機制淪為港鐵奉旨加價嘅擋箭牌，備受詬病，社會早就有聲音要求徹底檢討，但係當局一直闊佬懶理，家陣先至話港鐵提早一年檢討，聽住先喇。
咪話功夫茶踢爆，港府同港鐵着埋同一條褲，所謂嘅提早檢討可加可減機制，隨時又係一場騷嚟啫。係人都知，今屆政府都就快收皮喇，仲邊有力量撥亂反正吖，高官吹水唔抹嘴，其實都係拖字訣，將爛攤子留畀下屆政府。
話時話，港府無德無能，莫講對港鐵加價冇符，對領展嘅掠奪式經營手法坐視不理，對強積金機制千瘡百孔一樣束手無策，你估港府真係愚公咩，真係可以移除大山咩！計功夫茶話齋，香港一日冇有能嘅政府，想移除三座大山都幾難。