古人提倡「文明其精神，野蠻其體魄」。港人文明質素係點，睇吓港大學生會民主牆上嘅粗口大字報就知，好在市民運動風氣比較旺盛，好似港府推出嘅「全民運動日」咁，例必反應熱烈。可惜吖，由於當局安排失當，次次都搞到向隅者眾，怨聲載道，結果好事變壞事。
呢，今年「全民運動日」將於下月七日舉行，全港十八區康體設施，包括羽毛球、籃球、網球場等，一律免費向公眾開放，康文署各區場地「康體通」本周日起接受市民訂場。提提大家，由於每人只限預訂一節，而且先到先得，額滿即止，手快有手慢冇呀喂。
係人都知，康文署場地出晒名難book，特別係羽毛球、籃球等熱門運動更加係爭崩頭。老實講，康文署訂場安排漏洞多多，都唔知畀申訴專員公署炮轟過幾多次，點知情況冇改善不特止，反而不斷惡化，結果益晒班「炒場黨」。你哋話嘞，康文署場地平時已經超負荷，家陣免費開放，唔逼爆至奇，市民都係做定心理準備好啲。
正所謂屋漏偏逢連夜雨，場地供應本來已經緊張，加上救生員工會已經爆定響口，喺「全民運動日」期間罷工，到時泳客不得其門而入，轉戰其他康體場地，情況只會更加混亂。話時話，救生員工會三日唔埋兩日工業行動，仲專揀周末假日發難，將市民嘅福祉當爭取小圈子利益嘅籌碼，對於呢啲例牌動作，當局點都應該有兩手準備。咪話唔提醒，近排天口(興)，泳客大排長龍唔單止心火盛，一個唔好彩有人中暑暈低，咁就大劑喇！
冇計喇，港產官僚最叻就係化神奇為腐朽。最近有大型連鎖健身中心倒閉，本來康文署轄下健身室大有用武之地，問題係市民要先報讀署方嘅課程並通過筆試至可以享用設施，而相關課程又係僧多粥少，連候補位置都要早幾個鐘去排隊，結果咪又係得物無所用囉。
一句講晒，鼓勵全民運動冇人反對，但就唔係好似康文署咁每年做一日大龍鳳，之後就闊佬懶理。正如官老爺扶助本地體育事業，吹到天花亂墜，實際上運動員國際賽事攞獎，抽水從不缺席，但講到平日訓練場地等支援，就連影都冇埋。試過有港隊運動員出戰冬奧速滑，連運動鞋、頭盔等基本裝備都要食自己，簡直一殼眼淚。
計功夫茶話齋，如果唔想今次全民運動日又試倒瀉籮蟹，唔該康文署官僚齊齊離開冷氣房，同市民一齊排隊，體驗嗰種辛苦同擠迫法，將心比己，話唔定情況會有改善。