俗語有云，拜得神多自有神庇佑，真係唔到你唔信。好似大嶼山天壇大佛咁吖，一直以來香火鼎盛，信眾夠晒神心，可能因為咁，赤鱲角國際機場啟用咁多年都冇發生過乜嘢大事，近日更保佑香港避過一場險過剃頭嘅空中浩劫添。
話說啱啱過去嘅周日一架從福建晉江來港嘅深圳航空客機準備降落香港國際機場之際，懷疑機師認為與前機距離太貼，突然喺冇得到控制塔批准之下，自行決定復飛。最大鑊嘅係，機師自把自為不特止，仲要冇按復飛航道要求朝東北面飛行，反而胡亂向右邊大佛方向繞圈，當時航機嘅飛行高度只有三千英尺，唔止同最低安全飛行高度四千三百英尺有大段距離，直情低過大嶼山頂峰高度，結果飛機喺大佛頭頂呼嘯而過，差少少撞上，睇見都牙煙。
大家都知，香港空中交通出名繁忙，加上大嶼山遊客及居民眾多，機師係咁意「自由行」，萬一同其他飛機相撞，或者撞上大佛，後果不堪設想，今次有驚無險係好彩咋。難怪天文台前台長都忍唔住開火炮轟，直指今次事件係一宗機師違規飛行嘅嚴重安全事故，民航處必須徹查同埋處分有關機師咁話。係呀，人命關天，點可以蒙混過關o架。
其他民航機師亦睇唔過眼，話如果覺得同前機太貼，選擇復飛無可厚非，但必須得到空管人員批准，同埋按照香港復飛航道飛行，點可以自己鍾意點飛就點飛喎。今次事件留下好多謎團，民航處必須公開交代，絕對唔容許不了了之。
可惜吖，瞞得就瞞，拖得就拖，不嬲係政府部門嘅作風，尤其係民航處出名烏煙瘴氣，點會有例外。民航處對事件一直臭聞密冚，最匪夷所思嘅係，醜聞被網站曝光後，民航處依然輕描淡寫，淨係叫有關航空公司提交報告就算，冇任何處分，涉事機師日前仲大模廝樣再次駕駛客機來港，有冇再離譜啲吖？
紀綱一廢，何事不生。民航處執法不嚴，胡混度日，同攞乘客及市民條命較飛冇乜分別。嗱，有團體質疑今次事故可能同新空管系統有關，唔係無的放矢o架，係人都知耗資十五億元嘅新空管系統甩甩漏漏，問題多多，延誤四年拖到家陣先至分階段啟用，結果試用七日之嘛，即刻出事，你話冇問題都冇人信喇。
大家睇到啦，香港話就話係國際航空中心，但喺民航處領導之下，管理水平同第三世界冇乜分別，就算個朵臭晒嘅前處長羅崇文捲鋪蓋走人，一樣冇乜起色。今次就話有佛祖保佑啫，再咁落去，佛都有火，香港想唔爆大鑊都幾難咯。