政治唔可以當飯食，一個社會係咁，一間學校亦係咁。香港大學近年排名好似食咗瀉藥咁，跌跌不休，就係最佳例證嘞。
呢，話口未完又嚟喇。最新出爐嘅「香港最佳大學排名榜」，港大十五年來首次失落一哥寶座，被科大取而代之，仲落喺中大之後添。即係咁，港大國際排名插水唔係新聞，不過今次有少少特別，一來由市民做評判，唔到你唔服；二來調查由港大民意研究計劃負責，自己人照計應該唔會有偏見。
講真，呢個結果雖然有少少意料之外，但絕對係情理之中。港大貴為百年老店，一向執高等院校牛耳，上述調查三甲位置連續十五年依次由港大、中大同科大奪得，今年出現大洗牌，唔怪得連負責調查團體都話係「驚人變化」。
點解搞成咁？一言以蔽之，搞政治累事囉。調查結果顯示，科大得分只係較舊年微升，之所以能夠攀上榜首，係因為過去多年港大及中大持續失分，而港大嘅失分仲勁過中大，此消彼長咯喎，港大咪將冠軍位置拱手相讓囉。大家有眼見，近年社會泛政治化，港大尤其如此，部分教師不務正業，誤人子弟，甚至鼓勵違法；部分學生無心向學，將街頭鬥爭一套搬入校園，淨係一場委任副校長風波已經搞到滿城風雨，簡直係沒有最醜，只有更醜。納稅人眼見公帑供養嘅最高學府，由作育英才嘅象牙塔淪為培養青年政客嘅鬥獸場，睇見都眼冤，乜嘢形象分都扣晒喇。
嗱，大學生可以唔理社會大眾觀感，但畢業後始終要面對社會，斷估冇人想畢業變失業啩。上述調查顯示，僱主最想聘請嘅本地畢業生當中，昔日皇帝女唔憂嫁嘅港大生排名一樣係咁跌，由舊年排名第三進一步跌至今年梗頸四，問你點頂？大家應該記得，喺副校長風波裏面，前學生會會長被指違反保密協議，洩露校委會會議內容，當時就有人呼籲全港僱主永不錄用。又難怪嘅，打開門做生意，有邊個想請個夥計返嚟倒自己米吖，萬一向商業競爭對手洩密，咁咪捉蟲。
當然喇，樹大有枯枝，族大有乞兒，咁多學生裏面有少數人搞搞震一啲都唔出奇，弊在一粒老鼠屎足以搞壞一鍋粥，港大百年金漆招牌，就係咁樣畀少數激進分子佗衰，你話其他勤奮向上嘅同學係咪無辜吖。
學北大人話齋，港大好，大家好；港大亂，全體學生一齊埋單。講到底，市民對港大「負評」，都係愛之深責之切，恨鐵不成鋼。港大人，係時候反躬自省，諗吓點樣自救喇！