「今朝塞到依家，把幾火想爆炸……」歌神許冠傑四十年前嘅舊歌，嚟到今時今日依然啱用。冇計喇，香港地馬路已經夠晒窄，偏偏有啲司機大佬鍾意喺路邊亂咁泊車，咁搞法唔塞到七彩至奇。
大家有眼見，喺唔少繁忙路段，的士大佬停埋一邊等客有之，貨車上落貨有之，三條行車線剩番一條可謂司空見慣，唔塞就有鬼，連運輸署日前都承認，喺紅磡、上環等部分路段，行車速度竟然慢過步行。有見及此，警方即將展開為期一周嘅反違例泊車大行動，票控違泊以及其他阻塞交通嘅人士。尋日之嘛，警方喺灣仔莊士敦道一帶打擊違泊，短短十五分鐘已經發出多張牛肉乾。而喺上月另一輪為期一周嘅執法行動中，警方更派出超過四萬張牛肉乾，可見情況有幾嚴重。
點解違泊問題咁難解決？最重要當然係「土地問題」嚴重，市區咪錶位同停車場嚴重不足喇。正如尋日喺灣仔畀人抄牌嘅貨車司機大佬咁講，搵個車位難過登天，泊街邊都係迫不得已嘅咋。有數得計，近十年本港整體車輛數目大增三成，車位根本完全追唔上，唔怪得有啲司機為求就手亂咁泊住先，反正唔使扣分，都係罰款了事，況且警方執法次次都係風風火火一輪後就懶懶閒，斷估冇咁唔好彩斷正啩。
所以話，要杜絕違泊問題，必須多管齊下，警方固然要持之以恒加強打擊，最重要嘅係做好配套設施，特別係增加車位，否則講乜都係嘥氣。
話時話，一個地方交通安全狀況唔止反映基建及執法水平，仲係當地人文明質素嘅指標。世衞組織舊年發表全球道路安全報告，指全球每年有超過一百萬人死於交通意外，比率最高嘅國家係伊朗、印度、巴西以及中國內地等，呢啲地方文明質素係點，相信唔使多講。特別係內地，平時交通已經亂過亂世佳人，節假日更加塞到不可想像，蝸行牛步分分鐘仲快過揸車吖。
當然喇，香港話就話係文明城市，又成日笑強國人粗魯無禮，查實喺路面文明程度方面，有時都係五十步笑百步。淨係講亡命小巴，耐唔耐就搞出人命，甚至有「流動棺材」之稱，照計乘客為求自保，安全帶應該攬到實一實至係，可惜事實啱啱相反，最近警方喺小巴放蛇檢控無戴安全帶嘅乘客，結果仍然有唔少人中招，真係睇見都牙煙。
講到底，要改善交通環境，警方有法必依，執法必嚴固然唔少得，司機同行人改善使用道路態度，一樣咁緊要。「路上零意外，香港人人愛」，始終都要一人行多一步。