去酒樓餐廳食飯梗係要點菜o架啦，日後可能會出現咁嘅荒謬場口——
食客：「侍應呀，有冇一款菜式係冇毒o架？」
侍應：「對唔住，全部都存在黑心食品一定程度嘅風險。不過經過五星級大廚悉心篩選之後，我哋實施『食品三級制』。第一級，有機會屙嘔肚痛；第二級，有機會罹患癌症；第三級，有機會即時死亡。你想要邊一級吖？」
食客：「咁呀……樓又未買，婚又未結，暫時未想死住。我要第一級同第二級吖，唔該！」
嗱嗱嗱，功夫茶係就係講得誇張咗少少，之不過喺當今黑心食品氾濫成災嘅情況之下，毒性分三級的而且確係鐵一般嘅事實。
好似冇耐之前北京一位歲半小妹妹咁吖，只不過食咗街邊炸雞之嘛，居然口吐白沫小命不保。原來無良奸商利用毒性媲美砒霜嘅亞硝酸鹽為雞肉防腐，咁就害到人直接毒死嘞。亦即係話，呢一類黑心食品係毒性最猛嘅第三級。
至於第二級咯喎，乜鬼嘢瘦肉精呀，乜鬼嘢坑渠油呀，乜鬼嘢工業鹽呀，全部都足以令到好人好姐淪為癌症病壞。第一級算做不幸中之大幸o架喇，食客中招之後頂多上吐下瀉屙到不似人形，食物中毒理論上未至於奪魄勾魂。
有人可能會問，點解中國人條命咁賤嘅呢？點解全世界只有神州大地會容許黑心食品多到好似群魔亂舞？功夫茶為你提供一個老老實實嘅答案，黑心食品建基於官商勾結，如果冇貪官包庇，奸商再喪盡天良都冇辦法謀財害命。即使唔係夾手夾腳大發不義之財，國產官僚嘅監管模式都好有問題，出口外銷嘅食品安全標準相對嚴格，內銷就寬鬆到無倫，甚至係怠忽職守不聞不問。內銷食品添加防腐劑好多時候係合法o架，問你服未！
內地盛產嘅黑心食品又會唔會流入香港呢？呢家嘢真係冇人敢肯定，你知啦，本地官僚愈來愈似國產官僚，貪官包庇暫時未必會有，有都未必咁明目張膽，不過怠忽職守確係相當令人擔心。之前爆過好多次危機啦，孔雀石綠有之，三聚氰胺有之，負責把關嘅食物安全中心有邊一次唔係後知後覺？比死鬼恐怖大亨拉登更加恐怖嘅就係，堂堂一個特區政府居然話冇權下令回收或者停售相關食品喎，全人類畀佢激到吹鬚睩眼！
既然內地監管烏厘單刀，香港當然有必要金睛火眼到實一實。總而言之，理得你黑心食品是否分三級，把關不容再怠忽，一件都唔可以入口，否則鬼唔望直接毒死嘅係罔顧人命嘅庸官劣吏！