鷹隊小牛作客攞頭彩

季後賽次圈繼續吹冷風,縱然賽前有消息指戴歷羅斯將會榮升為史上最年輕常規賽MVP,但呢朵「毒玫瑰」卻未有因此綻放,手感欠佳之餘,完場前更再度觸傷舊患,結果公牛以95比103不敵鷹隊。至於衞冕冠軍湖人同樣在次圈首仗落筆打三更,在第3節仍領先小牛16分之下,竟被客隊翻盤,高比仔更因尾段失誤而成為輸波罪人。

戴歷羅斯膺常規賽MVP

據芝加哥多個媒體報道,公牛領袖戴歷羅斯已經獲選為今季常規賽最有價值球員,並以22歲7個月之齡,成為這獎項史上最年輕得主,聯盟將會在周四早上,公牛出戰鷹隊時頒獎。雖然收到好消息,但羅斯仔昨日在東岸準決賽第1戰面對鷹隊就臨陣跌Watt,全場27次投射僅入11球,命中率偏低成為公牛輸波關鍵,而佢更在完場前扭傷足踝舊患,要拐步離場,難免令公牛上下大為擔心。幸好「毒玫瑰」賽後透露傷勢並不嚴重,無礙下仗上陣。鷹隊今場靠祖莊遜食糊,個人轟入34分。

西岸方面,同樣係客隊搶得頭啖湯,第3節仍大幅落後16分之多嘅小牛,在最後一節急起直追,終在完場前19秒反超前湖人,以96比94逆轉贏波。高比拜仁今場攻入全場最高36分,可惜佢喺關鍵時刻接波時跣低,錯失第一個絕殺機會,之後又射失最後一擊,實在難逃罪人污名。不過高比仔賽後唔認衰,仲將責任推卸落二梯隊成員,批評後備貢獻太少,成為輸波關鍵。但有傳媒影到高比仔在賽前一晚去迪士尼樂園,慶祝佢寶貝女生日,唔通因為玩得太攰而搞到喺最後關頭冇晒力?

大帝被爆偷嗒歌星仔

另方面,今早將帶領熱火出戰塞爾特人嘅「大帝」勒邦占士被八卦網站《terezowens》指最近瞞住大肚女友Savannah,搭上咗21歲歌星仔Jordin Sparks,被封為新一代「賤男」。

本報綜合報道