大家有冇聽過「管治疫症」？呢一個咁精警嘅術語並唔係功夫茶嘅創意產品，發明家係前天文台台長林超英。你知啦，超英哥哥係英皇書院校友，由於不滿教育局強迫母校縮班，等同扼殺基層學生透過優質教育向上爬嘅機會，呢一位前任高官不惜同當今高官隔空駁火，批評特區政府患上官員言而無信、行事偏離法制嘅管治疫症。
連分屬自己友嘅前任高官都睇唔過眼，教育局係咪病情嚴重呢？何止病到五顏六色，簡直病到沉疴難起，大家不妨睇睇呢一劑奇聞怪事。教育局電腦系統出錯，三年之後先至發覺計錯八十一間直資學校嘅撥款，涉款總額超過千萬元。教育局上星期向多咗撥款嘅直資學校發信要求回水。其中獲多發七十五萬元嘅福建中學就話嘞，有關款項早已用於聘請人手，家陣先至嚟追數令學校十分頭痛。教育界立法會議員張文光對事件表示詫異，形容教育局處事兒戲。
你估擺烏龍嘅老爺奶奶有乜嘢解釋呢？教育局常任秘書長謝凌潔貞話喎，事件不涉人為錯誤。發言人補充，計算○八學年資助學校單位成本嘅電腦系統程式出現技術錯誤，原屬校齡十六年以上學校嘅部分學生，被錯誤調到十六年校齡以下嘅學校，以致多計校齡十六年或以上學校嘅單位成本，最終令兩者撥款對調。
呢啲咪係典型嘅官僚卸膊作風囉，千錯萬錯總之唔係自己錯。功夫茶問問謝凌潔貞，乜電腦系統程式唔係人寫嘅咩？點解電腦出錯就不涉人為錯誤？你唔好話電腦識得自把自為決定一切呀，功夫茶好細膽㗎咋，唔敢聽咁恐怖嘅鬼怪故事！
所以話啫，教育局真係有病，管治疫症沉疴難起，否則冇可能計錯數，仲要懵到上心口遲至三年之後先至叫人回水。喂，如果政府三年前有病態官僚計錯數，額外出多咗糧畀謝凌潔貞，今日叫你嘔番出嚟有冇問題呀？得未必話唔得嘅，條氣唔順咁解囉。
仲有一件事證明教育局病入膏肓，局方同教科書出版商研究課本同教材分拆，希望藉此減低書價，哈，談判居然破裂，書商宣布加價。你話嘞，如果主理其事嘅教育局副局長陳維安唔係一個管治疫症病患者，點會有咁荒謬嘅情況出現呢？
計功夫茶話齋，病就去睇醫生啦，管治疫症蔓延好大鑊o架，一來誤人子弟，二來權威掃地。唔好唔記得教育局肩負作育英才嘅神聖任務，自己都計錯數又有乜資格培養天才數學家呀！