邊個辣手摧花？邊個咁鬼殘忍？到底係何方妖道摧毀自然生態？
上水馬會道翠麗花園一帶種咗近百棵木棉樹，本來春暖花開正值賞花季節，嫣紅似火嘅木棉花開得璀璨奪目，都不知幾咁詩情畫意。你知啦，生活空間密密麻麻嘅香港石屎森林多過花草樹木，難得木棉樹開花調劑一下平日壓力大到爆煲嘅心情，吊頸都可以抖下氣吖。誰不知附近街坊抬頭一望嚇到傻咗，木棉樹上面嘅木棉花好似內地維權藝術家艾未未咁樣忽然失蹤，剩低死氣沉沉嘅光禿禿枝幹，凋零到以為日本核輻射咁快殺到埋身。
講到呢度，功夫茶要讚一讚網民力量再一次發揮作用。由於路見不平嘅網民將「木棉樹冇木棉花」咁恐怖嘅情景拍攝落嚟再掟上網，所以引起注意，隨之揪出元兇，原來又係好心做壞事。
件事其實係咁嘅，民建聯成員廖超華話接到居民反映，木棉開花結果之後會出現棉絮飄揚，誘發呼吸道毛病以及鼻敏感，又會影響冷氣機運作等等問題，所以就向康文署要求處理嘞，仲燒炮仗拉橫額宣布「成功爭取」政府為民請命添。康文署一心以為造福百姓，委託承辦商「摘除果實」。哈，唔知係講嗰個甩牙，定係聽嗰個撞聾，承辦商居然未等到結果就發揮硬膠精神走去將鮮花摘得一乾二淨滿目瘡痍。木棉樹又叫英雄樹，呢一鋪叫做英雄難過笨蛋關。
喂，麻煩相關單位唔好將大腦同屁股位置對調，但凡樹木梗係先開花後結果㗎啦，木棉要到五月先至結果，若然你真係為免棉絮飄揚滋擾民居，係都應該等到花期過咗踏入果期先至做嘢，有乜可能家陣就滾水淥腳走去摘花？雖然摘果都唔係幾好，事關好多人鍾意見到「五月飄雪」嘅浪漫情景，不過為免妨礙市民健康都叫做兩害相權取其輕。問題係你並非摘果而係摘花，呢一隻摧花魔爪無論如何都係犯眾憎o架嘞！
康文署話喎，摘果工作原定由四月十一日開始至十六日前完成，不過署方發現承辦商誤摘木棉花，加上有居民反對，所以已經警告承辦商並且要求暫停。嗱嗱嗱，呢啲咪就係典型官僚嘅縮骨神功囉，都話木棉樹要到五月先至結果咯，你一方面叫人四月開工，另一方面又推卸責任話承辦商搞錯，逼人食死貓都唔好咁蠻不講理吖。
即係咁，呢一單摧花事件由頭到尾一錯再錯，先係政客急於邀功，然後官僚愚不可及，承辦商錯就錯在冇足夠常識反問康文署，你話四月開工摘果，果都未有，摘條毛咩！