打電話問功課聽得多，打電話救命仔聽過未？講緊嘅唔係呃神騙鬼嗰啲乜功物功，而係關乎人命嘅急救服務。消防處下個月起試行急救及省時指引，由控制室透過電話教流血、手腳脫臼、骨折及燒傷人士喺救護車抵達前自行急救。
怪招聞所未聞，創意就加零一嘞，弊在牙煙程度同樣加零一。控制室人員臨床經驗不足，萬一處理過程出咗乜嘢差錯，後果可大可小。話就話可以慳時間，但分分鐘因快得慢，甚至可能搞出人命添，唔怪得救護員工會直斥，咁做等於將市民當白老鼠。
呢條屎橋擺明唔掂，但消防處仲死撐，話控制室人員具備急救知識，專長於緊急通訊，可以勝任有關工作，佢哋喺調派救護車之後先至覆電召喚救護車嘅市民，強調唔會延誤救援。
嗱，消防處就打晒包單嘞，咁前線救護員又點睇呢？消防處救護員會尋日開記者會踢爆，工會過去兩年一直爭取由救護人員隊目負責提供相關指引，但處方闊佬懶理，一意孤行，堅持安排控制室隊目級人員向Call救護車者提供急救指引。
講嚟講去，市民最關心嘅係，由救護人員或控制室人員實施急救指引，兩者有乜分別，邊個可以令病人權益得到更多保障。據工會所講，救護隊目級人員擁有二級急救醫療助理資格，而且最少有十年以上院前臨床經驗；控制室隊目只有基本急救證書，無論專業資格定係臨床經驗，層次完全唔同。明明有專業人員唔用，反而嘥資源另外培養一班人，完全係本末倒置，資源錯配，造成公帑浪費。
工會負責人亦狠批消防處別有用心「偷換概念」，因為喺其他國家，急救指引一般只適用於有即時生命危險及影響復原機會嘅傷病，而處方急救指引涵蓋嘅都係普通常識亦可以應付嘅傷病，懷疑處方係想予人控制室人員「呢啲人都得」嘅假象。
查實，當局搞咁多花臣，使出「病人自救」嘅怪招，無非係想為救護車服務因資源不足、質素每況愈下補鑊啫。由於人手長期不足，本港救護車嘅召達時間已經連續三年未能達標，舊年頭六個月更跌至只有七成召喚喺當局承諾嘅九分鐘內及時到場，病人因此而延誤治理更加係家常便飯。服務質素一年不如一年，當局唔係盡快增聘足夠人手，提高服務質素，反而玩「電話急救」，要市民自己搞掂，簡直不知所謂，講難聽啲，係攞市民生命安全較飛。
消防處推出嘅救護服務三級制，將「非危急個案」召達時間延長至二十分鐘，已經惹起極大爭議。當局唔諗計點縮短召達時間，反而推出無厘頭嘅急救指引嚟添煩添亂。計功夫茶話齋，咁搞法都唔知係想救人定害人。