吓？乜話？你講多次？功夫茶唔係撞聾，只不過難以置信消防處居然會有咁奇怪嘅事情發生啫。難以置信嘅事情就係，消防電台也撞聾！
前日喎，早上大概七點鐘，黃大仙鳳德邨黛鳳樓一名五十幾歲男子呼吸困難，電召白車救命啦。白車到場之後打算送佢去伊利沙伯醫院，主管向消防電台發出訊號要求留位，點不知不停呼喚十幾次都冇人回應。
相隔十分鐘之後，另一架白車奉召去黃大仙彩虹邨錦雲樓，接載一名因服藥後感到不適嘅六十二歲女子送院治療。救護車主管透過無線電要求伊利沙伯醫院留位，哈，同樣詭異嘅情況再次發生，叫極都冇人回應。
去到八點半左右，一名二十三歲青年懷疑不堪家庭問題困擾，喺紅磡機利士南路跳樓。救護員到場將事主送院，可惜消防電台繼續撞聾，硬係冇人回應。救護員情急之下打手機直接向伊利沙伯醫院要求留位，咁先至避免延誤搶救咋。
因乜事會出現撞聾咁荒謬嘅場面？你知啦，救人一命十萬火急，冇可能由於冇人回應而累街坊吖嘛。消防處發言人解釋話喎，事故因為訊號不穩引致，不過強調三名傷病者都冇受影響。
喂喂喂，消防處嘅救人設施都唔係第一次烏厘單刀㗎嘞，老爺白車三番四次跪低唔在講，其他嘅講出嚟直情好似天方夜譚。消防處走去買法國製油壓升降台，居然爆喉。消防處走去買新款煙帽系統，居然冇貨。消防處走去買理論上唔會再跪低嘅救護車，居然冇考慮到實際路面情況，買番嚟嘅新車比舊款白車高出三十厘米，無法通過限高三米嘅通道，車身又比舊車闊咗十厘米，部分救護站要貼出一張咁搞笑嘅告示：新款救護車請勿進出。
由於採購裝備經常出問題，所以政府派出效率促進組展開研究，得出嘅結論係消防處犯咗五宗罪。一，欠缺全面策略，管理亦欠條理；二，無資料顯示不同尺碼制服存貨量，令處理換制服申請時出現困難；三，無專責隊伍負責採購工作，採購工作交由無採購專才嘅單位負責；四，欠缺有效嘅管理架構監察採購工作；五，無電腦系統處理採購，要大量人手處理。
一句講晒，管理混亂。既然係咁，消防電台撞聾會唔會同採購裝備以及管理混亂有關呢？功夫茶懇請消防處高層唔好再傻傻更更，必須嚴肅正視問題，救人設施烏厘單刀確實令人擔憂，延誤搶救害到小市民家散人亡邊個負責呀！