今時今日，衣食住行樣樣加價，窮人惟有節衣縮食。不過咁，買少件衫、食少一餐，都勉強捱得住，唯獨交通費加完又加，慳無可慳，唔通游水過海返工咩？
公共交通工具輪流加價，最慘係貧困家庭，收入已經掹掹緊，大人返工仔女返學，坐車搭船每人畀多一蚊幾毫，加加埋埋唔係講玩。有人統計過，唔少打工仔交通開支佔收入超過一成，再係咁加法，民怨遲早爆煲。
公共交通工具話加就加，皆因港府好似黃大仙咁有求必應。有學者狠批當局，考慮巴士加價申請時計入「市民可承擔能力」，但釐定準則唔清唔楚；而港鐵嘅可加可減機制又冇計算市民承擔能力，完全係「大細超」，要求港府全面檢討機制同提高透明度。亦有立法會議員建議，各政黨聯手促請當局為港鐵成立票價穩定基金同八達通月票計劃，減輕市民負擔。
冇錯嘞，現行機制唔止九唔搭八，直頭係專搵市民笨。好似港鐵嘅可加可減機制咁，通縮時候港府唔搞，等到通脹重臨先至推出，結果弄巧反拙，「可加可減」變成「只加不減」，你話係咪荒謬吖！
更荒謬嘅係港府助紂為虐，漠視通脹高企低下階層百上加斤，身為大股東，對港鐵加價闊佬懶理，仲要百般維護呢個為富不仁嘅企業，市民唔就假。
當局帶頭掀起加風，其他公共交通工具又點會執輸吖，仲唔有樣學樣趁機掠水咩。於是咪搞到巴士、小巴、渡輪、纜車「海陸空」齊齊加價囉。
最離譜嘅係，每次有公交機構申請加價，港府一係藉口「市場行為」翹埋雙手，一係用「商業決定」做擋箭牌，將責任推得一乾二淨，好似市民嘅利益同班高官完全無關。當局監管無所作為，營運商加價無所顧忌，通脹梗係如虎添翼啦。
冇錯，當局整色整水搞咗個所謂交通津貼計劃敷衍市民，可惜唔湯唔水變晒質，唔只諸多設限，而且同交通津貼完全冇關。其實，港府與其搞咁多花臣，不如做得徹底啲，設立交通票價穩定基金，咁豈不是更加名正言順，一了百了。
計功夫茶話齋，既然港府對可加可減機制情有獨鍾，不如索性加多個「可上可下」機制做配套，如果交通費加風繼續失控，問責高官就要即刻落台謝罪！