日本受到地震海嘯蹂躪搞到滿目瘡痍，固然值得寄予萬二分同情，而且災民嘅得體表現更加贏盡讚賞，起碼唔似得中國人傻頭傻腦走去盲搶鹽，之但係東京電力公司嘅救災表現就令人不敢苟同嘞。福島核電站洩漏輻射至今，東電仍然好似老鼠拉龜咁遲遲無法解決，嗰個乜鬼嘢主席又經常玩失蹤，難怪忍無可忍嘅日本人會向佢哋發出死亡恐嚇啦。
東電幾時先至可以堵截輻射洩漏呢？暫時真係天曉得，唯一可以肯定嘅係生態環境嚴重破壞，事關呢一間公司唔知點解會將大量輻射水排出大海，嚇到鄰近國家俄羅斯以及南韓相繼抗議。喂，莫講話外國抗議吖，連日本漁民都怒不可遏，你叫人哋以後點樣捕魚維生呀？
禍水滔滔排出大海確係影響深遠，成條食物鏈無可避免慘遭污染。乜嘢碘呀，乜嘢銫呀，仲有嗰隻聽講遺禍幾萬年嘅，一旦被海洋生物吸收，層層相扣之下最終會變成閣下嘅珍饈美饌。成日都話全球一體化，你以為唔食日本貨就可以冇事咩？錯嘞，畢竟魚係會周圍游嘅，尤其係遠洋魚類，有本事環繞地球幾個圈，唔排除有部分游咗去日本感染輻射，再游到去印尼成為魚獲，轉個頭賣咗嚟香港。喂，唔好唔記得中國同日本都好近o架咋，國產貨隨時都會有輻射魚蝦蟹。
好嘞，既然咁大鑊，點算好呢？專家話未來十年係癌症爆發高峰，如何自救？計功夫茶話齋，首要任務當然係敦促特區政府好好把關啦，特別係食物及衞生局、食物環境衞生署、衞生署以及政府化驗所呢一條「官方食物鏈」必須從嚴處理，防範受到污染嘅食物入口，唔做得再甩甩漏漏容許輻射貨如入無人之境。仲有呀，假如驗到輻射貨，千祈唔好學似天文台測量輻射塵咁延遲三日先至公布，蛇都死啦！
當然啦，功夫茶唔係專家，冇資格教大家點樣自我防備，淨係可以分享一項已知常識，大量吞食碘鹽無助抵抗輻射，反而會搞到腎虧，更何況香港市面上嘅食鹽不含碘質，所以搶到都係廢嘅。
講到呢度，功夫茶有少少擔心，畢竟本地官僚防範問題食品嘅往績乏善足陳，禽流雞又有，哮喘豬又有，農藥菜都有，笨手笨腳歷歷在目，你話點樣能夠令人放心呢？不如咁啦，等功夫茶嚇一嚇食衞局局長周一嶽，若然閣下再一次失職，把關不嚴搞到輻射食物鏈害人不淺，患癌怒民必定會衝去府上打到你扁一扁！