獅子山下近日一片灰濛濛，空氣污染指數持續偏高，因乜事咁烏煙瘴氣？咪多得港府好帶挈囉，推動環保講多過做，減排政策一塌糊塗，唔烏煙瘴氣至奇。
哈，你話幾應景呢，正當香港被灰塵籠罩，環保署公布咗上年粵港珠三角區域空氣監測數據，反映本港污染程度有增無減。唉，港府減排束手無策，所謂藍天白雲，好似阿崩叫狗咁，愈叫愈走。
話時話，港府過去十年耗費數十億元推行減排措施，係威係勢，點知監測數據顯示，香港境內兩項主要空氣污染物二氧化氮同臭氧嘅濃度，五年來未見改善，反而惡化咗，其中臭氧嘅年均值更加升咗近一成，減排變「添臭」，你話係咪搞笑吖。
香港減排五年無寸進，市民焗住日日吸廢氣，當局例牌又推出補鑊措施，其中一項係建議為石油氣小巴同的士引入紅外線遙距監察器，監察超排車輛。嗱，咪話功夫茶唔提醒，學者指出，當局近年大力推廣嘅石油氣搵食車，若然維修不善，唔只改善唔到空氣，仲會令空氣變差添。香港空氣中嘅臭氧不減反增，正正係呢個原因，各位官老爺，唔該幫幫忙，唔好再添煩添亂喇。
咦，講開又講，港府○九年咪做咗一項諮詢嘅，當時仲大鑼大鼓提出減排十九招㗎，點解石沉大海無咗下文呢？其實，點只十九招冇咗下文，港府搞環保不嬲都係雷聲大雨點小嘅喇。官僚做嘢求求其其，得過且過，空氣質素又點可能改善吖。環保團體指出，空氣污染會誘發各種疾病，甚至有研究指每年有數百港人因污染早死，官老爺對改善空氣唔嗲唔吊，唔通真係高高在上，不吃人間灰塵？
事實證明，港府開口埋口講環保、講減排，全部係敷衍民意嘅咋。例如港府一直堅持沿用嘅空氣污染指標，其實已經係廿幾年前嘅過時制度，即係話，香港標準比世衞同歐盟落後廿幾年，港府打死都唔肯更換，係人都知有蠱惑喇，好簡單，就算污染指數超出國際標準，都可以誤導市民，蒙混過關吖嘛。咁搞法，點只係敷衍民意，直情係弄虛作假喇。
唉，一句講晒，政府烏煙瘴氣，香港自然亦烏煙瘴氣。夕陽政府敷衍塞責混日子，旨意佢哋減排，蛇都死喇，各位市民以策萬全，最好買定口罩看門口！