如果有睇相佬同你講，恭喜你呀，你今日出門會遇貴人，你會點諗呢？功夫茶就覺得呢一句贈興之言未必可喜可賀，事關有貴人相助等於你有缺憾。即係咁，大富大貴之家不必憂柴憂米，完全唔使貴人相助都有能力自給自足，只有窮苦人家先至需要善心人士雪中送炭。
講真，香港嘅貴人確係唔少㗎，出門遇到嘅機會率相當高，可惜同時反映貧窮問題愈來愈嚴重。好似香港青年協會咁吖，呢一個非牟利機構絕對稱得上係貴人，佢哋今年第二次舉辦「我係義工‧送米助人」計劃。嘩，反應熱烈到呢，簡直令人心有戚戚然。
青協發展幹事文雪瑩指出，由於通脹升溫導致需求殷切，今年送米計劃接受申請嘅地區由舊年十一個增至十四個，受助家庭名額亦增加五百戶至二千五百戶，每月贈送七公斤白米，非綜援戶家庭優先考慮。結果咯喎，今年申領送米嘅住戶高達五千二百四十二戶，較去年二千九百八十戶急升百分之七十六。當中以元朗同屯門係最需要支援嘅地區，來自元朗區嘅申請高達九百三十九戶，較去年飆升超過三倍，屯門區嘅申請有四百九十一戶，上升一點八倍。
嗱嗱嗱，遇貴人真係未必可喜可賀㗎，唔係窮到燶都唔使接受送米啦。至於通脹升溫呢家嘢，更加係窮苦人家嘅催命符，簡直係愈窮愈見鬼。
通脹升溫成點呢？批發商話呀，雞蛋價格試過半年升三成，後來供應量多咗先至回落，舊年平均升幅大約一成半。相比其他食品價格，蛋價升幅已經係最溫和㗎嘞。喂，最溫和都升價一成半，試問冇米落鑊嘅草根階層點開飯呀？
講來講去咪又係政府嘅扶貧政策失敗囉，否則非牟利機構都唔使疲於奔命接濟窮人。大家必須注意一點，青協送米嘅對象主要係非綜援戶家庭，即係話香港有大量窮人得唔到官老爺伸出援手。香港社區組織協會幹事施麗珊就講得啱嘞，政府嘅扶貧政策「不到位」，歎慢板之餘又後知後覺，若然毫無寸進改善，只會令到更加多人申領食物援助。
唉，成日都話政府「窮得只剩下錢」，真係一啲都冇講錯。庫房唔係話莫財，反而錢多到水浸，一眾食飯唔知米貴嘅高官硬係唔肯做貴人之嘛。財政司司長曾俊華做過一次貴人咁大把，奇就奇在派錢六千銀居然都搞到天怒人怨。
計功夫茶話齋，禮失求諸野，官方嘅扶貧政策真係太失敗嘞，大官小吏死性未改之前，惟有拜託民間組織繼續為善最樂，通脹猛於虎之下窮家開飯靠貴人呀！