日本三一一世紀大地震發展至今，有乜嘢影響呢？影響真係多籮籮，為食鬼忽然之間冇得食日本魚生啦，哈日族冇乜勇氣再去日本旅行啦，購物狂有錢都未必買得到新版日本電器啦。
至於另一項比較嚴肅嘅影響就係，愈來愈多人關注核電安全問題，外國甚至已經出現反核示威浪潮要求關閉核電站。
之所以會反核，無他嘅，洩漏輻射嘅福島核電站搞來搞去都未收拾好爛攤子，各國核電站唔知幾時爆大鑊。東京電力公司社長清水正孝雖然走去福島避難中心逐一向災民道歉，仲要係下跪嗰隻，不過受到冷淡對待。咁又難怪喎，鬼叫你東電救災不力咩！
好嘞，睇番最接近香港嘅大亞灣核電站，萬一受害於地震之類嘅天災或者恐怖分子惡意破壞，會唔會淪為福島翻版？中港兩地官方答案梗係大派定心丸話乜事都冇啦，可惜吖，可信程度絕對唔高。你知啦，官老爺最拿手就係藉口維持穩定局面而刻意隱瞞真相，大叫「狼來了」固然冇乜人信，大叫「狼不來了」同樣缺乏說服力。
美國太空總署一項最新研究發現，全球大約九千萬人喺核電站方圓三十公里之內居住，一旦爆發類似福島核災難，生命隨時受威脅。假如將範圍擴大至核電站方圓七十五公里，受到核災難威脅嘅人數更加多達五億，其中以中國嘅大亞灣核電站以及嶺澳核電站附近住有最多居民，連同香港在內總共涉及五千六百萬人。半億中國同胞隨時變難胞呀，老友！
喂喂喂，一來核電安全缺乏信心保證，二來大亞灣核電站附近又有全世界最多嘅潛在災民，特區政府係咪應該正視危機，好好監察運作情況之餘，仲要減少核電輸入呢？死得佢吖，環境局局長邱騰華呆若木雞，居然從未講過審視二○二○年增加核電輸入嘅計劃喎。
綠色和平尋日發起反核大遊行，示威者要求環境局盡快擱置增加核電計劃，而且打算星期二繼續狙擊邱騰華。其中一個示威者講得好啱：「政府太懶，做唔好節能措施，淨係想用簡單方法增加能源供應，根本係取易捨難。」
計功夫茶話齋，反對增加核電係絕對正確嘅，邱騰華未必有本事關閉大亞灣核電站，但係點都唔應該鼓勵內地擴大核能輸出從而製造更大危機。
功夫茶提提邱騰華，一旦爆發核災難，香港境內冇人能夠置身事外，難胞包括邱氏一家。換句說話，為公為私邱局長都唔好咁懶，增加核電輸入計劃一定要擱置！