辛辛苦苦捱世界，如果打工賺得雞碎咁多，梗係慘情啦，所以最低工資嘅立法原意係善良嘅，保障基層嘅收入等於維護人類嘅尊嚴，冇理由做到腰痠背痛都朝不保夕吖嘛。問題係特區政府確係特衰政府，好心永遠做壞事，即將於五月一日實施嘅最低工資法例隨時變成勞資關係大決裂嘅導火線。
先睇睇政府有冇帶頭做好最低工資保障，答案竟然係冇嘅。工聯會調查發現，政府三十二個部門總共外判服務合約超過四千八百三十份，聘用超過三萬僱員，當中一半以上月薪低於五千八百二十四元。如果以一個月二十六日、每日八小時計算，時薪低過二十八元嘅法定水平。喂，一半以上即係一萬五千人呀，幫政府打工居然都冇最低工資，好冇尊嚴啫！
關於呢一個毫無以身作則風範嘅問題，官老爺似乎都蠢唔晒，據聞政府傾向於直接利用公帑補貼外判承辦商，估計涉及款項數以億元計，等佢哋有足夠彈藥為員工加薪加至合理水平，包括發放飯鐘錢同有薪假。勞工及福利局局長張建宗就話嘞，正在內部研究，將會盡快決定。
呢嗱嗱嗱，唔好怪功夫茶以小人之心度君子之腹呀，政府如果真係補貼外判商，隨時又係好心做壞事，事關「官商勾結」以及「無商不奸」始終係戒之不絕嘅本地特色。學似職工盟秘書長李卓人話齋，憂慮外判商更改合約，到時政府決定補貼，工人亦都無法受惠。
更改乜嘢合約呢？咪就係近來最流行嘅剝削員工奸計囉，法例冇規定用膳時間同放假日子必須計薪吖嘛，無良僱主一個二個變身算死草，更改合約剔除飯鐘錢同有薪假。奸計若然得逞，最低工資就會形同虛設，打工仔或者有機會加薪嘅，只不過象徵式加少少咁解。
萬一真係出現咁嘅情況，你話嘞，公帑補貼外判商會有乜嘢後果呢？四個字：中飽私囊！
唉，真係勞資關係大決裂o架，話就話有最低工資保障，實際上好可能原地踏步，如果你係做到腰痠背痛都朝不保夕嘅草根階層，你真係嬲到震o架。若然再加上戇居居嘅政府以為補貼外判商就可以造福勞工，點知有人從中食價，身為打工賺得雞碎咁多嘅你肯定心靈受創，簡直就係傷上加傷。到時咯喎，已經十分尖銳嘅深層次矛盾更加激化，你話點收科？
計功夫茶話齋，好心張建宗局長之流嘅官老爺千方百計堵塞法例漏洞，否則勞工哀歌變成四面楚歌，香港永無寧日！