神奇啊神奇，華夏同胞愈來愈有資格贏取諾貝爾化學獎，繼化學物質三聚氰胺喺中國人手上發揚光大之後，家陣竟然有辦法「豬肉變牛肉」，你話係咪勁到冇朋友呢？傳說之中有「點石成金」，現實裏面有「點豬成牛」，中國人嘅化學天才表露無遺，外國科學家都要甘拜下風啦！
點豬成牛嘅具體方法係咁嘅，你北上尋歡嘅時候順手買幾樽「牛肉膏」添加劑，返到屋企咯喎，用嚟醃製豬肉，醃呀醃，醃呀醃，醃到咁上下豬肉就會變色，落鑊一炒，牛香撲鼻。當你學識咗豬肉變牛肉之後，假如咁啱得咁蹺你嘅良心跌落坑渠一嘢沖走咗，你就可以返內地開檔進軍飲食業，做一個無良奸商販賣含有致癌物質嘅假牛肉。
喂喂喂，記住記住，中國人嘅化學天才唔止咁少㗎，除咗牛肉膏之外仲有雞肉膏同羊肉膏，足夠畀你喪盡天良以假亂真大發不義之財。
唉，中國人係就係勁到冇朋友，可惜全部用喺邪門歪道。知唔知上海有人發明咗一款「環保饅頭」呀？所謂環保意思係廢物利用循環再造，將過期饅頭染色重新包裝，咁就可以攞去呃錢。當然啦，染色材料又係有害嘅化學物質，食你唔死算你好運。
有人可能會疑惑，點解中國嘅食物問題咁嚴重？點解炎黃子孫嘅肚皮好似一座化學實驗室，劏開一攤即刻變成一張化學周期表？功夫茶可以老老實實話畀大家知，中國官場太腐敗嘞，腐敗到包庇奸商為禍人間。記唔記得三鹿毒奶粉當初係得到國家認證免檢㗎？換句說話嚟講，冇貪官就冇奸商，中國執法人員乜都打壓，藝術家又打壓，茉莉花都打壓，就係唔打壓黑心食品。萬一你淪為受害者咩，唔好意思，不准伸冤，一伸冤馬上冤上加冤，你會好似趙連海咁以莫須有罪名關押大牢。
有人形容當今嘅中國簡直就係彼此相殘大屠殺，你餵我一口假牛肉，我餵佢一口瘦肉精，佢又餵你一口坑渠油。呢種講法功夫茶贊成㗎，假以時日中國即使冇鴉片都會個個變成東亞病夫。
計功夫茶話齋，今時今日嘅中國冇資格誇誇其談大國崛起，試問邊有一個大國容許黑心食品氾濫成災㗎？又試問邊有一個大國唔去取締無良嘅害人精，反而懲罰無辜嘅受害者㗎？
嗱嗱嗱，功夫茶甘冒忽然失蹤嘅天大危險，不得不向國家領導人進一諫言，好心你哋唔好再容許中國官場咁污糟邋遢啦，唔好再包庇奸商打壓良民，否則咯喎，亡黨亡國都有之！