兒童受到性侵犯係罪大惡極嘅禽獸行為，好似狂人卡達菲統治嘅利比亞咁有變態士兵強姦兒童，鬼唔望整個五雷轟頂剿滅所有人渣敗類。既然係咁，特區政府係咪應該傾盡全力保護兒童避免淪為色魔獵物呢？理論上梗係應該啦，可惜本地官僚嘅辦事作風一向拉牛上樹，效率慢過蟻躝。
好咯好咯，保安局終於扚起心肝有少少作為，局方接納法律改革委員會去年建議，計劃今年下半年分階段設立名為「性罪行定罪紀錄查核機制」嘅行政措施，容許僱主招聘從事與兒童及精神上無行為能力人士有關嘅工作之前，可以喺準僱員自願之下，查核性罪行定罪紀錄。
具體做法係咁嘅，準僱員親身前往警方指定辦事處繳交百多元費用，辦理手續開啟查核戶口，並且套取指模確保身份無誤。申請者會得到一個有效期六個月嘅電腦隨機查詢密碼，然後準僱員將密碼交畀準僱主，再利用自動電話查核系統知悉「有」或者「沒有」性罪行定罪紀錄。至於相關罪行詳情咯喎，準僱主係唔會知嘅。
照咁樣講，日後家長咪唔使驚乖仔乖女受到性侵犯囉？呢嗱嗱嗱，都話咗官僚作風拉牛上樹啦，保安局做一半唔做一半，成個機制仲有好多漏洞。首先，機制首階段只容許相關機構或企業僱主有權查核，家長係無權使用嘅。其次，機制未能涵蓋現職僱員、私人家庭補習老師以及獲判無罪案件同海外定罪紀錄等等。
喂，機制未能涵蓋現職僱員好危險啫，萬一有色魔早已潛伏喺校園，校方想查都查唔到，小朋友咪隨時送羊入虎口？至於家長無權查核，加上不涵蓋私人家庭補習老師以及海外定罪紀錄，呢一個漏洞大到好似新政府總部「門常開」。大家不妨幻想一下，請個家庭補習老師原來係變態色狼，請個外國傭工照顧仔女居然係超級孌童癖，家長無權查核之下變得蒙在鼓裏，心肝寶貝慘遭魔爪蹂躪完都唔知發生乜嘢事啦！
立法會保安事務委員會主席涂謹申講得啱呀，機制未能處理現職僱員等等多種情況，批評保安局只推出行政措施係「歎慢板」，要求政府盡快立法。
防止虐待兒童會總幹事何愛珠就話嘞，歡迎機制但應盡快開放畀家長使用，長遠亦應訂立法定機制，並且伸延至所有有機會接觸兒童嘅工作。
計功夫茶話齋，設立性罪行定罪紀錄查核機制出發點係好嘅，不過唔應該甩皮甩骨吖嘛，保安局必須盡快堵塞漏洞，千祈唔好做孌童癖嘅幫兇！