開講都有話，一物治一物，糯米治木蝨。咁功夫茶又問問大家嘞，廢物治廢物，會有乜嘢後果呢？未揭曉答案之前，睇睇香港嘅街景先啦。
嗱，呢度係深水埗，黃竹街汝洲樓對出，半條行人道佔據大量建築廢物，阻塞一條行車線，危及行人行車安全。根據街坊透露，樓上單位裝修，懷疑係有人貪方便將廢物隨街亂放，幾日都唔見有人清理。
嗱嗱，呢度係長沙灣，長沙灣道通街有四、五十包廢物，行人要繞道而行。至於司機咯喎，見到尖銳嘅鐵釘以及破爛嘅磚瓦，當然驚到偷位駕駛，隨時引發交通意外。
嗱嗱嗱，呢度係大角咀，利得街情況大同小異，總言之又係大包小包泥頭霸佔行人路，硬係冇人負責清理。不過有一點比較特別，利得街部分路段原來屬於「私家路」，亦即陷於非常狀態「四不管」，你去報官處理咩？環保署又唔理，地政總署又唔理，路政署又唔理，食環署又唔理，大官小吏牛鬼蛇神老爺奶奶統統闊佬懶理。
好嘞，假使政府部門真係生生性性走去執手尾，搵人清理大街小巷堆積如山嘅建築廢物，咁咪一天都光晒囉。等功夫茶引述立法會議員王國興嘅講法，有人隨處棄置建築廢物，政府執手尾變相要由公帑補貼「大垃圾蟲」，執法部門應該加強追查源頭找出元兇，發展局同屋宇署應該監督泥頭清理，嚴厲檢控不負責任嘅承建商。
講到呢度，係時候再問一問大家，廢物治廢物，會有乜嘢後果呀？答案就係，通街盡木蝨！
喂，真係有木蝨o架，建築廢物包括又殘又舊嘅木材，你話冇木蝨反而難以置信。即係咁，政府官僚疏於執法吖嘛，任人通街丟棄超級垃圾，卒之搞到滿目瘡痍。現行法例對於建築廢物有管制o架，物主必須自費將棄置物品送去堆填區，可惜吖，環保署同食環署等等衙門有法不依，變相助長違規行為。所以話啫，唔清理就損害市容，一清理就浪費公帑。
其實道理一字咁淺，官老爺只要認真執法嚴禁通街亂放建築廢物，咁就你好我好大家好。問題係廢物遇着廢物，香港嘅街景變成慘不忍睹。
棄置物品送去堆填區引伸到另一個問題，堆填區空間有限，假以時日逼爆咗點算好呢？唔通又伸出魔爪侵佔郊野公園？唉，講來講去又係廢物治廢物，好心環境局局長邱騰華如果真係江郎才盡無計可施，退位讓賢罷啦，面對空氣極度污染嘅香港人唔想環境再惡化落去呀！