「冧樓呀，走呀！」舊年土瓜灣馬頭圍道發生冧樓死人慘劇，出事前十五分鐘，最先察覺大禍將至嘅裝修工人就係一邊跑出危樓，一邊大叫。當時樓宇望上去安然無事，無人相信會冧樓，點知好快「轟」一聲整棟樓崩塌粉碎，十秒鐘變成廢墟，釀成四死兩傷。
慘劇不堪回首，本來唔想舊事重提，之但係，時至今日，港府官僚作風依然未改，好多市民依然生活喺冧樓危機之下，咁就唔可以當睇唔到，任由官僚繼續害人。
事情係咁嘅，土瓜灣塌樓慘劇發生後，港府大鑼大鼓高呼「特事特辦」、「以公眾安全為先」，將附近唐樓列入收購重建計劃範圍。點知一年轉眼過去，收購計劃因捲入訴訟而落實無期，當局就可以慢慢拖啫，但早已千瘡百孔嘅唐樓又點可以等㗎。呢，近日冧樓危機再現，不同座數樓宇相繼有大塊石屎從天而降，天花鋼筋盡露，牆身又驚現多處裂痕，真係睇到人膽戰心驚。
舊樓石屎剝落，隨時危及路人安全，而住戶居於危牆之下，更加係提心吊膽，有店主坦言好驚冧樓慘劇隨時重演。話時話，慘劇在前，危樓失修，政府部門睇唔到嘅咩？其實，佢哋唔係睇唔到，而係詐傻扮懵，就算接獲居民投訴，一樣闊佬懶理，乜嘢特事特辦吖、以公眾安全為先吖，根本係吹水唔抹嘴。
塌樓危機四伏，你估班官僚幾老定呀。屋宇署回覆居民，視察完證實有樓梯石屎鬆脫，已即時清除，漏水情況亦已轉介水務署跟進，強調「樓宇無任何迫切結構危險」，不會採取任何行動喎。而市建局嘅卸膊神功更加練到爐火純青，直頭話部分業主未出售物業，當局無權介入，指維修樓宇係業主責任，一句講晒：唔關佢哋事。
人哋話「好了傷疤忘了痛」，港府仲厲害，傷疤未好已經忘了痛。災難發生時，就十萬火急，事情一過，就關人個關。正如專家所言，滲漏持續，大量石屎剝落，反映樓宇結構已經受損，租客隨時有危險，如果換轉呢種危機徵兆發生喺政府總部，屋宇署仲會唔會咁氣定神閒吖嗱！鬼咩，日日擔驚受怕嘅唔係佢哋吖嘛。
唉，唔知港府係真無能定假無知，話就話保養樓宇係業主責任啫，問題係業主都識「特事特辦」，間樓都即將被收購咯，仲點會揼錢維修吖？基於公眾安全，港府其實可以主動維修危樓，事後再向業主追討費用嘅啫，咁都唔肯做，證明佢哋懶咯。喂，依家講緊公眾安全，人命關天喎，唔通要重演悲劇先至知驚！