雨季將至，山泥傾瀉危險期又殺埋身，尤其係香港遍布危險斜坡，唔好彩整幾場颱風或黑色暴雨，早前日本大地震引發海嘯嘅恐怖場面，隨時喺本港出現。
功夫茶唔係危言聳聽㗎，修葺危險斜坡刻不容緩，任何拖延都可能付出生命代價。牛頭角慕光英文書院所在嘅一幅斜坡多年前已被指有危險，校方○四年接到修葺令，但工程依家仲未完成。咁就奇喇，學校有危險斜坡，萬一出事，後果不堪設想，點解要拖咁耐？原來另有內情。
校方前幾日入稟高院，指有人佔用斜坡底部嘅僭建物經營士多，阻礙修葺工程，要求法庭下令對方遷出。原來案中有案，事關學校坐落斜坡頂，要步行半粒鐘至落到士多，除非對方遷出並且拆除僭建物，否則工程無法進行。
由於官府各自為政，審批例遲，工程拖到○八年至開始，其實除咗因為僭建物阻礙而無法完成嘅部分，其他修葺工作已經搞掂。如果當局一早掹咗呢眼「釘」，工程點會一拖再拖，學校點會提心吊膽，市民又何須擔驚受怕吖？
話時話，清拆僭建物唔係由屋宇署負責嘅咩？點解要由學校自己入稟打官司嘅？唉，咪又係因為官僚卸責囉。係人都知港府對付僭建物反應遲鈍，拖得就拖嘅喇，問題係，家陣僭建物影響到危險斜坡修葺，隨時搞出人命，班官一樣關人個關，各自為政，仲有冇麻木啲吖？
冇法子喇，睇怕今次又係一筆糊塗帳。唔講唔知，其實教育局早喺九七年已提醒慕光英文書院要保障斜坡安全，仲話如果接到修葺令就可以申請貸款添，學校梗係想快啲開工啦。
弊在官僚辦事墨守成規，一成不變，你急佢唔急。修葺令○四年至發出已經夠離譜，校方仲要同教育局、屋宇署、建築署等部門打交道，衙門之間又將個波踢來踢去，繁文縟節，費時失事，九七年發現問題，拖到○八年至開工。咁簡單嘅工程拖咗超過十年，唔怪得人哋話港府回歸之後一事無成咯。
眨吓眼又過多三年，勢估唔到官僚作風毫無改變，危險斜坡「巋然不動」，涉及僭建嘅士多繼續大模廝樣戙喺度，當局對師生同途人嘅安全闊佬懶理，簡直豈有此理！
講開又講，全港各區仲有二千七百個潛在危險斜坡，當局話預計十年內可以完成修葺喎。吹水就得！一幅危險斜坡拖咗十幾年都未搞掂，功夫茶請問港府，其餘嗰兩千幾幅打算拖幾耐？係咪要見到棺材先至識流淚吖？