公立醫院尋日起，停收非本港孕婦預約分娩服務至今年底，以紓緩產科爆煲壓力。本來呢，當局落閘截龍，優先服務本地孕婦係無可厚非嘅，點知此舉引起關注港人內地妻子權益嘅組織不滿，準備發起「捕嶽行動」，食衞局局長周一嶽顧此失彼，有排頭痕咯。
醫管局話，舊年公立醫院有一萬一千名非本地孕婦產子，而今年到依家已接受九千宗內地孕婦分娩及預約個案，接近舊年全年總和，推出截龍措施係要確保本地孕婦服務唔受影響喎。
其實，內地孕婦逼爆產房，完全係當局反應遲鈍，後知後覺造成嘅惡果。正如香港產科服務關注組召集人話齋，問題已達臨界點，如果當局再唔採取措施，遲早爆煲嘅咋。
遲做嘢總好過唔做嘢，最怕係亂做嘢。話時話，當局今次「一刀切」停收非本港孕婦預約分娩服務，未必可以解決問題，反而可能添煩添亂。好簡單，因為呢項措施，港人內地妻子統統被打入另冊，唔能夠嚟香港生ＢＢ，咁又點解決呢？關注團體批評周一嶽多年來漠視港人內地配偶在港分娩嘅權利，今次截龍係侵犯人權及無人性，計劃發起「捕嶽行動」，一於如影隨形，見一鑊纏一鑊。
而更令當局頭痕嘅係，周一鑊臨渴掘井訂下「八萬八」生仔封頂大計，諗住搵私家醫院硬啃，點知被對方拒絕。梗係啦，分娩服務係龐大商機，人哋賺開有條路，點會聽周一鑊支笛減收內地孕婦吖！
唔使問阿貴，公院減私院唔減，內地孕婦一定湧去私院分娩。呢，唔少內地中介機構已經周圍拉生意，話公院冇得入，仲可以安排孕婦入私院分娩，收費貴少少。私院「風景這邊獨好」，勢必向公院挖角，搶婦產科醫護人才，到頭來受影響嘅又係本地孕婦，你話當局係咪捉蟲吖。
正所謂，冰凍三尺，非一日之寒。近年內地孕婦所生子女佔本港生育比例不斷提高，當局如果未雨綢繆，做好應對措施，點會搞到今日咁左支右絀，進退失據吖？家陣問題瀕臨爆煲，當局先至頭痛醫頭，腳痛醫腳，整個「生仔指標」出嚟敷衍民意，遲唔遲啲吖。
話到尾，對非本港孕婦預約分娩落閘截龍只係權宜之計，治標不治本。其實，解決問題可以分兩步行，短期措施係分級制，優先為本港孕婦提供服務，其次係港人內地配偶，如果資源許可再適量接收其他內地孕婦。長遠嚟講，就要增加資源投放，培養足夠醫護人員應付需求。
更唔少得嘅係，當局必須盡快制訂長遠人口政策，每年有四萬多名內地孕婦來港分娩，第日勢必對本港教育、醫療、就業帶來沉重壓力。請問當局：呢啲問題諗過未？準備點應付？到時會唔會又搞到一鑊泡？