如果你憂柴憂米生活潦倒，功夫茶本來會勸你發憤圖強，不妨以「命運在我手永不低頭」作為激勵士氣嘅主題曲。之不過咁，當你見得多本地惡官不斷趕絕自力更生嘅草根階層，立場可能會動搖，話唔定伸大手板攞綜援冇咁嬲。
嗱嗱嗱，作威作福嘅食環署又玩嘢。銅鑼灣有一位七十四歲小販伯伯，街頭擺賣「炭燒雞蛋仔」超過廿年嘞，街坊街里幾乎無人不知，個個叫佢「雞蛋仔阿伯」。人哋一把年紀出嚟靠一雙手搵食啫，無牌雖然係無牌，食環署使唔使檢控得咁頻密呀？一個月被控七次，每次罰款八百大元，搵埋都唔夠罰。尋日喎，「雞蛋仔阿伯」一開檔，食環署第一時間衝出九個人兇神惡煞又話檢控。附近茶餐廳負責人睇唔過眼，挺身而出直斥食環署不近人情，簡直就係欺凌老弱。仗義執言得到近百名圍觀者認同，群情洶湧表達不滿。
知唔知乜嘢叫做欺善怕惡？食環署就係示範單位，作威作福九人組眼見眾怒難犯，即刻報警求助，六架警車接近三十名警員撲過嚟控制場面。擾攘粒幾鐘之後，小販伯伯仍然被帶走。
好嘞，功夫茶問問大家，做小販親力親為搵少少蠅頭微利有冇錯先？千錯萬錯只錯在無牌之嘛，偏偏食環署又唔再發新牌，你叫人哋點算呢？類似欺凌小販嘅先例多到罄竹難書，最經典嘅莫過於連有牌小販都玩殘，好彩有法官明察秋毫主持公道咋。有牌雪糕仔朱仲華被食環署檢控無牌售賣珍寶珠，法官溫紹明質疑署方胡亂檢控，然後輕輕罰款一百元了事，而且好言相向同雪糕仔咁講：「夏天行到熱，見到你會好開心，下次去尖沙咀希望可以幫襯你。」換言之，法官都覺得食環署涼薄到極。人同此心，心同此理，「雞蛋仔阿伯」得到群眾支持係有道理嘅。
如果你以為食環署嘅作威作福只限於胡亂檢控，你錯嘞，呢一個混帳衙門有時會無賴到砌人生豬肉。早幾日之嘛，食環署喺屯門新墟街市附近巡查，發現有一個生果檔貨物阻塞通道，要求將貨物搬返店內，期間店東兒子將木櫈掟向貨物再反彈落地，對方居然大叫「有人襲擊」喎。多得天有眼，警方到場翻查俗稱「天眼」嘅閉路電視片段，證實並無襲擊事件，如果唔係咯喎，又係六月飛霜。
計功夫茶話齋，慘遭屈機嘅受害者報警指控有人涉嫌妨礙司法公正係絕對正確嘅，食環署趕盡殺絕老弱小販都應有此報咯，係時候為公義反擊惡官！