自稱「公信第一」嘅《明報》，○八年報道「香港拉登」馬照聲嘅消息，刊登誹謗《東方日報》及其管理層嘅內容，去年被原訟庭判處誹謗指控成立，須向東方賠償合共一百八十萬元，當中包括加重性額外賠償。奇怪嘅係，《明報》提出上訴後，雖然上訴庭確認誹謗指控成立，但就將賠償金額大幅減少至二十萬元，而且作出臨時頒令，要遭誹謗嘅東方全數支付《明報》上訴嘅訟費，簡直豈有此理！
喂，依家係《明報》誹謗東方噃，東方贏官司輸訟費，有冇荒謬啲吖！咁豈不是等於公告天下：抹黑有理，誹謗無罪？咁豈不是話畀全世界聽，妖言惑眾有運行，做好市民無好報？呢啲究竟係乜嘢法治嚟㗎！
講到呢度，有人可能會問，《明報》到底點樣誹謗東方呢？件事係咁嘅。○一年九月及十月，馬照聲將署名「香港拉登」嘅信寄畀《東方日報》，揚言喺超市食品落毒，要求「千古罪人」董建華下台。東方恐禍及無辜，即時報警並協助警方拘捕馬照聲，及時阻止被落毒食品流出市面，結果馬照聲被判入獄六年八個月。點知呢個冒牌拉登懷恨在心，出獄後展開報復，百般滋擾及抹黑東方報業集團，結果再被法庭裁定兩項刑事恐嚇罪成，判監九個月。
呢件事嘅是非黑白本來好清楚，《明報》被控誹謗，係咎由自取，點知上訴庭居然反過來懲罰東方，唔怪得有人話香港真係撞邪咯。查實，東方贏官司輸訟費，都唔係第一次㗎啦。呢，九六年爛果報不問自取，盜用前東方刊物《東方新地》嘅「王菲懷孕乘飛機」獨家相片及雜誌封面，東方入稟控告爛果報侵權，雖然原訟庭判東方勝訴，但僅獲賠八千零一元，卻要負擔對方一百萬元訴訟費用。東方不服上訴，官司纏擾三年，由原訟庭到終審法院，東方一路勝訴，最終仍要負擔合共二百幾萬元「懲罰性」堂費，你話係咪匪夷所思吖？
唉，講來講去，只怪東方不識時務，以為香港回歸之後就係中國人當家作主。正如全國政協委員劉夢熊話齋，香港只係主權回歸，治權仲未回歸，所以，反中亂港先至有運行，第日再遇到類似香港拉登嘅事件，千祈唔好做好人，當唔知就算喇，如果唔係，隨時落得好似趙連海嘅下場。仲有吖，劉夢熊仲提醒東方，「連大陸網、大陸官網都插埋隻腳落嚟誹謗你哋」。
冇錯喇，劉夢熊就講得啱嘞，喺香港，講正義絕對係冇用嘅。嗱，功夫茶不妨教東方一條橋，唔好再堅持喇，人哋賣蘋果，你哋可以賣菠蘿嘅啫，係咪！