放任村屋僭建 官腦狗屁不通

嗱嗱嗱，功夫茶並唔係鼓勵大家犯法，假如人人都將村屋僭建成超級豪宅，後果不堪設想咯，你都唔想見到明明三層高嘅村屋拔地而起變身十八層屏風樓啦。之但係咁，既然政府隻眼開隻眼閉懶於監管，唔排除真係有人擺明車馬打造三尖八角怪獸屋。

不如咁啦，先睇睇申訴專員點講。申訴專員公署主動調查政府取締新界村屋違例建築情況，發現有關部門只係對於「正在施工」嘅違例建築採取行動，至於「正在施工但已實際完工」咯喎，竟然不在執法之列。申訴專員就批評嘞，當局冇致力遏制村屋嘅違例建築，令人覺得厚此薄彼，同時又指摘各大部門花費太多時間去確定建築物是否正在施工，態度散漫，優柔寡斷。申訴專員建議發展局、屋宇署以及地政總署建立個案資料庫，統一各部門嘅處理程序，並應該對全港所有違例建築一律執法。

「正在施工」先至執法，「實際完工」放任不管，有乜嘢問題呢？官僚嘅腦袋邏輯上狗屁不通囉。打個譬喻吖，有一個色魔「正在強姦」一位唔知係咪做官嘅路人甲，警察叔叔當場撞破當然要執法拉人啦，咁係咪話「實際姦完」就毋須理會呢？你試下叫警方運用呢一種管治模式去除暴安良吖，功夫茶寫包單香港馬上淪為盜賊如毛嘅罪惡世界。實際搶完又冇事，實際劫完又冇事，唔做賊就笨咯！

只係針對「正在施工」嘅違例村屋，智商稍稍正常嘅都諗到點樣應付啦，你咪發出清拆令囉，人哋拖得就拖，一旦拖到「實際完工」咯喎，過咗海就係神仙，你吹呀！

由咁嘅人頭官腦去取締大量僭建嘅村屋，效果之差可想而知，淨係有百分之五嘅違例村屋自願清拆僭建物，其餘嘅睬你都傻。難怪申訴專員黎年狠批現行政策「拖延苟且、欠缺成效」。

有人可能會問，釘契可唔可以阻嚇村屋僭建呢？理論上釘契係有用嘅，村屋賣唔出吖嘛，業主咪乖乖就範囉。問題係有部分業主打算住成世，唔賣屋就唔怕你釘契。仲有一個情況，買家未必介意釘契物業，只要雙方你情我願，交易照樣可以完成。所以話啫，發展局一眾官僚如果好似舊時咁懶懶閒，唔採取更加雷厲風行嘅措施，新界遲早遍地盡見怪獸屋！