弊傢伙，政府有病魔！
唔知係風水欠佳定係乜鬼嘢事，最近一個二個高官輪流入廠修理，數數手指，人肉機器總共壞咗四件。
第一個係教育局局長孫明揚，要做小腸氣手術咁話。第二個係商務及經濟發展局局長劉吳惠蘭，由於腸癌而入院治理。第三個係中央政策組首席顧問劉兆佳，官樣文章係話「沙田威爾斯親王醫院接受一項預防性手術」，實際病情係點外界不得而知。
高官冧完一個到一個，最新發展係素有人肉錄音機之稱嘅政制及內地事務局局長林瑞麟，去到瑪麗醫院接受俗稱「通波仔」嘅心臟血管擴張手術。不過又神奇喎，林公公做完手術之後鬼打都冇咁精神，即刻話第二日可以上班。
咦咦咦，咪住先，功夫茶似乎計錯數，若然計埋前年心臟病發嘅財爺曾俊華，高官入廠係總共五個呀，唔到你話唔邪！
政府有病魔咁又點呢？可大可小㗎，官老爺貴體違和關乎公眾利益，如果唔係當日董建華都唔使因為腳痛而落台啦。就好似身為最高智囊嘅劉兆佳咁吖，為民意把脈靠晒佢老人家，萬一錯估形勢都不知點算好。當然有人會認為，劉首席錯估形勢多過食飯啦，○三年預測幾多人上街遊行錯到一塌糊塗，卒之五十萬示威者改變歷史。話係咁話，之不過你可以將最高智囊當作「指路明燈」吖嘛，佢買大，你買細，咁咪冇錯囉。
計功夫茶話齋，今時今日醫學昌明，再加上高官通常會有特權優待，前年曾俊華就唔使學似小市民咁死等爛等先至入到手術室啦，入廠修理冇必要過分擔心。反而令人擔心嘅係，高官頻頻遇病魔係咪象徵成個政府病鬼咗？你知啦，萬一政府有病，受害嘅係七百萬同胞，唔講得笑㗎！
呢嗱嗱嗱，講番曾俊華吖，唔知係咪佢老哥心臟病發破壞人肉機器嘅中樞神經，居然交出一份「史上最廢」嘅財政預算案喎。呢家嘢好明顯係成個政府嘅病徵，否則冇可能連派錢都派到天怒人怨。
人病就話可以睇醫生啫，如果政府病到五顏六色可以點呢？唔通真係走去搵個風水大師贈兩句？睇風水唔係話唔得嘅，不過時下呃神騙鬼老千多，遇人不淑好大鑊㗎，一個唔覺意庫房儲備忽然之間變成一個人嘅私有遺產，咁就該煨咯！
不怕高官遇病魔，最怕政府病鬼咗。不如咁啦，各位達官貴人以董建華為師，若然真係覺得病到頂唔順，落台返屋企養病啦，只要病態官僚唔再阻住地球轉，政府病情應該可以紓緩少少。