成日話一分錢一分貨，但落喺港產官僚手中，多多錢買番嚟嘅都係豆腐渣。好似個新空管系統咁吖，大拿拿耗資十幾億元，點知問題多多，本來已經拖遲多年先上陣，結果仍然三日唔埋兩日甩轆，再咁落去，遲早爆大鑊嘅咋！
呢嗱，話口未完又嚟料喇。有傳媒引述民航處消息人士指，今年一月農曆新年航班高峰期間至少發生六宗「航機飛行間距不足」安全事故，其中五宗涉事航機未能維持平面距離至少五海里以及垂直距離至少一千呎，違反國際民航組織標準，部分更加係因為系統未能發出警報所致，空管人員應急時間受到影響，簡直險過剃頭。
咪以為五海里同一千呎好長距離吖，對於高速飛行嘅航機嚟講絕對係間不容髮，低過呢個距離分分鐘出事。而最離譜嘅係，過去使用舊空管系統時，同類安全事故一年最多發生十宗八宗，家陣唔夠一個月就連爆六鑊，連資深空管人員都話「歷來罕有」。
話時話，新系統廢到無倫，問題數到天光都數唔晒，唔係出現「鬼機」就係畫面突然消失，再唔係就警鐘誤鳴，亦因為咁，部分前線員工擔心喺自己當值時出狀況，有得請假就請假，怕咗佢先怕米貴。
大家有眼見，民航官僚除咗做大花筒，最叻就係粉飾太平，一味吹農曆新年期間處理航班數量破紀錄，對安全事故破紀錄隻字不提；至於民航處老頂、就快夠鐘執包袱嘅運房局局長張炳良亦係例牌護短，死撐系統「表現良好」，你話如果唔係內部踢爆，機毀人亡都未知咩事吖。講真，民航內部人士冒住被秋後算帳風險都選擇做「吹哨者」，都算勇氣可嘉咯。
空管系統新不如舊，入錯貨就梗嘅嘞，問題係唔買都買咗，家陣最緊要堵塞漏洞，防止意外發生。早排民航處係威係勢，又話成立專家小組查找不足，又話聯絡承辦商高層來港跟進事件，唔該唔好有姿勢冇實際。仲有就係追究責任，前特首曾蔭權爵士任內好大喜功搞政績工程固然難辭其咎，但呢個爛鬼空管系統連印度機場都彈到一文不值，偏偏有人情有獨鍾，當中有冇涉及以權謀私同利益輸送，係咪應該學立法會議員話齋，老廉快啲搵民航處前處長羅崇文飲番杯咖啡呢？
講到問責，功夫茶不期然諗起北京市前市長王安順，佢當年治霾立下軍令狀，話唔成功就「提頭來見」，結果頸上嗰頂烏紗帽真係被摘走，邊似得港產官僚咁幸福，賴嘢奉旨唔使上身，連羅崇文呢類醜聞厚過電話簿嘅庸官劣吏，都可以穩袋過千萬退休金，真係吹脹！