開講有話︰「酒乃穿腸物」，特別係青少年，缺乏自制能力，好容易泥足深陷，酗酒成癮。呢，連大學問家胡適都係咁講︰「少年恨污俗，反與污俗偶。自視六尺軀，不值一杯酒。倘非朋友力，吾醉死已久。」你都咪話唔大件事！
講完古人，講番香港。早喺二○○○年本港就開始實施酒牌制度，禁止持酒牌嘅食店或酒吧喺「處所內」向十八歲或以下人士售賣酒類飲品，之但係青少年喺「處所外」飲酒就唔受規管，包括便利店同超市等零售店舖攞正牌賣酒畀青少年。為咗堵塞呢個漏洞，食衞局計劃修例，禁止喺任何商業活動中向青少年售賣及供應酒精飲品，預料最快本年度提交立法會。
港產官僚拖咗近廿年至補鑊，反應仲有冇再遲鈍啲吖？衞生署幾年前做嘅調查，已經發現曾經飲酒嘅高小學生同中學生比例，分別達四成四同六成二，其中每月最少飲酒一次嘅，高達一成幾。有關注團體係咁講嘅，求助嘅青少年酒徒當中，十居其九都係喺超市或便利店買，亦有唔少人幫屋企成年人買酒，順便自己飲埋一份。
講真，只要班高官唔好成日匿埋喺冷氣辦公室，多啲深入民間睇吓就一清二楚。未夠秤嘅(o靚)仔(o靚)妹喺便利店成pack成pack咁入貨，話都冇咁易，證明齋靠業界自律完全唔可行。查實幾年前已經有人提議效法新加坡、加拿大及英國等地，連便利店同超市都要攞酒牌，可惜官老爺借咗聾耳陳隻耳，睬你都有味。
當然喇，如果當局修例後冇監冇管，疏於執法，一樣出事嘅咋。好簡單，舖頭打開門做生意，唔通下下查個客身份證咩？試吓遇着個狼戾啲嘅，開拖都有份。有辦你睇㗎，食肆禁煙實施多年，好多地方都係陽奉陰違，有啲為免得失啲客，甚至主動奉上「米缸」，加上控煙辦懶懶閒，通宵食肆煙霧瀰漫，仲衰過舊時。
不過同港產官僚講呢啲道理，睇怕都係對牛彈琴嘅嘞。大家有眼見，班廢官做嘢有邊鑊唔係添煩添亂，有邊鑊唔係好事變壞事㗎，淨係故宮文化博物館已經搞到滿城風雨，杰過芝麻糊。仲有吖，港產官僚有法不依，執法不嚴，由姑息假難民犯案到取締工廈亂象，無一例外。所以話，新例原意係好，但實際效果仲要睇過至知。
全面落實青少年禁酒，冇人會反對，但一定要多管齊下，除咗加強執法，宣傳教育一樣咁緊要。不過嘥氣喇，大嘅唔好教壞細，唐唐、貪湯一類高官個個以歎靚酒為榮，年輕人有樣學樣，以為嗒番兩杯好cool好有型，結果咪搞成依家咁囉！