古人用蠟燭照明，而蠟燭下面有蠟燭座，光線照射唔到，形成「燈下黑」。呢嗱，內地一再向香港移交逃犯，而香港就從未向內地移交過一個逃犯，一國之內嘅香港儼然內地逃犯嘅避難天堂，呢啲咪典型「燈下黑」囉。
幾年前香港一名外籍主控官遭淋腐蝕性液體，案中懷疑港人主腦潛逃內地七年，早前終於喺新疆落網，直至尋日由內地當局移交香港警方，連埋轟動一時嘅「衣櫃藏屍案」疑犯，回歸近二十年，內地向香港移交咗一百七十五名逃犯，而香港就一個都冇。本港某五星級酒店聚集大量內地問題富豪，早就係公開秘密，有人形容香港唔單止係貿易自由港，更加係內地罪犯嘅自由港，真係一啲都冇誇張o架。
最諷刺嘅係，香港同好多國家及地區簽咗引渡協議，但同內地嘅司法互助仍然停留喺優化通報機制層面，就罪犯引渡安排嘅磋商一直阻力重重。講得好聽係因為兩地司法制度有差異，講得難聽啲其實係信唔過內地司法制度。
冇錯，內地司法制度問題多多，亂象叢生，呢點冇人否認，但咁唔代表可以縱容罪犯逍遙法外。即使同中國冇正式引渡協議嘅地方，一樣可以逐單個案處理，遠嘅例子有賴昌星從加拿大引渡返中國，近期例子就係「獵狐行動」，中國成功從美國、英國及澳洲等押返大批「紅色通緝人員」。至於大陸同台灣，雙方早就有罪犯移交協議，肆虐一時嘅電騙案，台籍主腦就係經引渡歸案。兩岸仍處對峙關係都傾得埋欄，香港冇理由唔得啩。
其實道理好簡單啫。移交罪犯應該對等，你唔合作時人哋都可以唔合作，好似近年電騙黨、貴州幫、廣西幫喺本港頻頻作案，如果冇內地配合查案拉人，只會天下大亂嘅咋，可以咁講，內地當局對香港警方有求必應並唔係老奉，而係特殊照顧。話時話，近年接二連三發生「強力部門越境執法」、「自行北上協助調查」風波，與其搞到滿城風雨，不如盡早制度化好過。
中港兩地真係要建立罪犯移交制度，其實大可循序漸進，從經濟、刑事等罪犯着手。平生不作虧心事，半夜敲門也不驚，除非係長期反中亂港又或者係佔領幕後黑手，自己「身有屎」嘅啫，否則有咩好怕吖！
始終都係嗰句，泥水佬開門口，過得自己過得人。內地幫你捉賊就體現一國兩制，內地叫你交人就破壞一國兩制，點講都唔通。總而言之，中港引渡罪犯問題，始終都要拎上枱面傾，繼續將頭埋喺沙堆，始終唔係辦法。