正所謂親兄弟，明算帳。美國同澳洲呢pair盟友，為咗接收千幾個難民嘅問題搞到反面咁滯，特朗普仲鬧前任奧巴馬簽嘅協議愚蠢。講到愚蠢咯喎，今時今日各地對難民閂大門都閂唔切，惟有港府中門大開，來者不拒，先至蠢得交關！
係人都知特朗普打擊非法移民勇字當頭，但原來澳洲政府都唔輸蝕，除咗打美國主意，企圖將禍水外引，仲喺離島及境外設立禁閉式難民營，以防佢哋踩入社區騷擾良民。咁都未算，當地政府最近通過法例，凡係坐船非法入境嘅，將被終生禁足澳洲，不論係旅遊、商務抑或探親簽證，一概不予受理。
大家睇到喇，澳洲地大物博，資源豐富，人口稀少，一樣對難民敬而遠之。仲有吖，澳洲同香港一樣簽署咗聯合國難民公約，澳洲可以鐵腕打擊非法入境而港府碌碌無為，唔怪得大部分接受「東方報業民意調查」訪問嘅市民狠批港府假仁假義，畏首畏尾，無非想將爛攤子留畀下屆政府。
假難民問題已經成為治安毒瘤同埋財政負擔，送走呢班瘟神，絕大部分市民舉腳贊成。港府之所以一直唔敢重錘出擊，皆因驚畀人標籤「種族歧視」、「違反人權」。講真，壓力就梗有嘅嘞，你估澳洲冇畀國際組織批評咩，人哋政府企硬咪又係冇佢符。至於特朗普反非法移民，雖然國際同埋國內嘅壓力相當巨大，但特朗普講得出做得到，被譽為找數真漢子，一樣唔少人拍爛手掌。
睇番港府，既唔敢退出國際公約，又唔敢設立禁閉式難民營，更加唔敢對人蛇即捕即解，淨係識增加資源處理免遣返聲請，結果猶如抱薪救火，問題愈演愈烈。有地區人士就講得啱嘞，道高一尺，魔高一丈，酷刑聲請者蠱惑招數多的是，淨係會面時請病假一招，已經大大拖延成個審核時間。事實勝於雄辯，當局截至去年底審核嘅六千多個免遣返聲請個案中，只有四十八宗確立，真難民百中無一，咁就難怪大部分受訪者直指聲請機制被嚴重濫用，浪費公帑養假難民喇。
其實道理一字咁淺，香港好食好住又好搵，人蛇一張行街紙在手，打黑工又得，作奸犯科又得，加上港府包食包住包打官司，咁好嘅待遇，唔嚟香港就傻咯。所以話啫，只要偷渡誘因一日存在，人蛇一日都會前仆後繼。
講多無謂，行動最實際。港府舊年同今年施政報告都話要研究設立禁閉營，高官甚至話考慮退出國際公約，到依家影都冇，睇怕都係「走數」居多。下任特首熱門成日吹自己「好打得」，係真係假，假難民問題就係試金石嘞！