港府聽日發表施政報告，亦係今屆特首任內最後一份施政報告，唔少團體把握最後追數機會，要求政府兌現施政承諾，之不過開講都有話，承諾容易兌現難，有名你叫「走數政府」，之前四年幾都係得個吉，更何況依家進入倒數階段，更加難有咩作為。啱啱升呢做政務司司長嘅張建宗，形容嚟緊係一份「有為」嘅施政報告喎，大家聽住先喇！
話時話，港府近日「債主臨門」，好不熱鬧，門常開爭在未畀人淋紅油嘅咋。淨係前日之嘛，最少有五個團體要求港府找番全民退保、標準工時以至取消強積金對沖等幾條數，敦促港府縮減公屋輪候時間及全面落實十五年免費教育等，就連小朋友都忍無可忍，冒住凜冽寒風上街請願抗議，問你服未？
講真，又真係佛都有火嘅。早幾日有調查顯示基層兒童缺衣少食嘅情況相當普遍，有啲小朋友甚至連每日有魚有肉嘅正餐都保證唔到，點會有健康同快樂吖。連內地都識講，再苦不能苦孩子，難為港產官僚成日將扶貧當政績咁吹，究竟知唔知個醜字點寫？
講起香港嘅下一代，真係多得呢個走數政府唔少。「十五年免費教育」明明係施政承諾之一，庫房有足夠能力承擔，市民亦樂觀其成，可惜港產官僚一樣做到唔湯唔水，不倫不類，話就話免費，實際上唔少學校要額外加價先至維到皮，以致家長負擔仲重過舊時；至於其他承諾，包括改善幼稚園同小學學額分布，紓緩學童跨區上學之苦等，更加通通未見影。
呢幾日除咗小朋友，亦有老人家踩上門叫港府找數。又難怪嘅，好似全民退保咁吖，港府又係講過唔算數，美其名淨係肯幫助最有經濟需要嘅長者，實際上係斤斤計較算死草兼分化社會。唔怪得今時今日咁多長者晚景淒涼，七老八十仲要出嚟執紙皮揸小巴揸的士。提提大家，當年特首參選政綱之一，係全面評估長者住屋需要，並制訂長者住屋政策，講就動聽嘞，可惜港府連長者院舍不足問題都改善唔到，有關政綱唔使問阿貴，都係好似八萬五咁，唔再講等於唔存在喇！
事實勝於雄辯，現屆政府上場口號多多，又話「適度有為」，又話「迎難而上」，又話解決房屋問題係施政重中之重，結果係點大家有眼見。特別係房屋問題，基層輪公屋愈來愈耐嘅同時，樓價愈來愈高，市民置業夢愈來愈渺茫，唔天怒人怨至奇。
始終都係嗰句，見過鬼怕黑。特首參選人當中唔少都係走數政府嘅高層，香港搞成咁，佢哋難辭其咎，繼續下巴輕輕，亂開支票，連上帝都擺埋上枱，叫市民點信得過吖！