毒海鮮賣到通街 懶把關官僚靠害

農曆新年快到,團年開年飯又點少得美味海產吖。不過市民選購時真係要打醒十二分精神,事關喺食安官僚把關不力下,問題海產長驅直入,一個唔好彩病從口入,咁就認真大吉利是嘞。

唔係靠嚇㗎。本報記者日前從香港仔、九龍城同元朗三區街市以及凍肉舖,抽樣購買多個新鮮及急凍海產樣本,交畀大學檢測,結果發現全部都含有介貝類水產禁用嘅抗生素氯霉素;亦有新鮮扇貝樣本及一個急凍海產樣本重金屬鎘含量超標,最誇張嘅甚至超標逾一倍,問你怕未?

究竟氯霉素同重金屬鎘係乜東東?醫生係咁講嘅,人體對氯霉素產生敏感,進食後會影響骨髓,導致未能生產血液,出現再生不良性貧血症,嚴重者可以致命;至於重金屬鎘,人體吸收後會不斷累積,好難排出,長期累積喺骨骼同腎臟,嚴重起上嚟同樣可以致癌。

最得人驚嘅係,氯霉素唔單止喺海產裏面禁用,連西醫都淨係用喺動物身上,而唔會開畀病人,偏偏呢種劇毒之物,原來係養殖業界最經常用嚟殺菌嘅抗生素,本報隨手抽查市面海產,即時發現有殘留,可想而知問題有幾嚴重;反觀食安中心,過去三年淨係提出七宗檢控咁大把,市面可能仲有好多漏網之魚。仲有吖,本港唔少海產都係嚟自內地,係人都知內地海洋污染嚴重,海產本身就係一個活生生嘅化學元素周期表,絕對唔止重金屬鎘咁簡單,市民到底食咗幾多有毒海產落肚,真係冇人話得埋。

大家不妨諗吓,連法例禁用嘅氯霉素都可以賣通街,其他冇規管嘅有害物質點算?你知喇,本港食安法例出名落後,淨係重金屬含量嘅法例,三十幾年如一日,標準已經比國際以至內地寬鬆幾十倍;反式脂肪亦係咁,人哋美國早就將相關材料剔出安全名單,並為全面禁用訂立時間表,唯獨港產官僚關人個關,試問市民健康仲有咩保障?

冇計喇,香港班食安官僚就係咁嘅嘞,渾渾噩噩,不監不管,孔雀石綠魚、蘇丹紅蛋、坑渠油、哮喘豬肉……市民早就深受其害。早排內地官媒聲稱香港有「食品安全港」美譽,全賴內地檢驗檢疫部門幫手把關,有冇自我貼金冇人知,大家淨係知次次食安爆親大鑊,本港當局次次都係傳媒踢爆或外地揭發後至如夢初醒,急急補鑊;難為班官仲(扌豆)咁多錢人工,你話係咪食塞米吖。

呢兩日最多人拗到面紅耳熱嘅,莫過於香港未來幾年係咪應該「休養生息」。其實計功夫茶話齋,當市民連食餐安樂茶飯都成為奢望,仲講咩「休養生息」吖,「安息」就有份!