今日係大年初三，傳統上稱為赤口，特別容易口舌招尤。唔知係咪好嘅唔靈醜嘅靈，港產官僚又開口中嘞，淨係取消強積金對沖咋，隨時搞到勞資雙方吵大鑊都似。
係人都知，取消強積金對沖係現屆政府嘅施政承諾，點知上咗台就冇晒下文，拖到家陣差不多落台先至重新擺上枱面，擺明姿勢大於實際。早前當局拋出方案，話取消強積金對沖不設追溯期，仲會降低長服金或遣散費作配合，而且頭十年由港府為僱主提供額外補貼。咪以為講到係威係勢咁款，其實大部分打工仔唔可以即時受惠之餘，長服金或遣散費又少咗一截，而老闆嘅支出一樣有增無減，東不成西不就，結果咪搞到劣評如潮咯。
咁就難怪新官上任嘅政務司司長張建宗唔見有「三把火」，只能美其名曰有關方案喺未來三個月進行公眾諮詢，實際上將爭議問題推畀公眾，所謂行政會議六月就會敲定方向，希望下屆政府跟進喎，即係本屆政府鐵定「走數」，將燙手山芋拋畀下屆政府接手囉。再講吖，本屆政府只係「敲定方向」咋，唔係最終決策，下屆容乜易推倒重來㗎。
講真，強積金制度先天不足，後天失調，話就話係保障打工仔安享晚年，其實係保障基金經理予取予攜，加上允許對沖，更係備受詬病。大家有眼見，強積金推出十五年來，已經沖走咗逾三百億元，都咪話唔誇張。家陣港府聲稱逐步取消對沖，但打工仔並無拍爛手掌，原因好簡單，大家都知呢屆政府廢到冇朋友，根本無法擺平阻力。呢，各大商會已講明唔會接受，仲話咁做對中小企係雙重負擔，勢必影響工商界及本港經濟發展。撐到咁行，擺明唔使旨意讓步啦。
所以話啫，勞資雙方雞同鴨講，注定傾唔埋欄，港府以為係咁意進行公眾諮詢就可以擺平，簡直想創個心，結果又係將隻鑊卸畀下屆，自己就拍拍籮柚走人。好明顯，今屆政府所謂施政承諾「基本上落實」，其實係「基本上落空」至真，取消對沖就係典型例子嘞，一個大腳長傳，將個波踢畀下屆，呢啲咪叫陰濕兼縮骨囉。
「明日復明日，明日何其多；我生待明日，萬事成蹉跎。」都係古人有智慧，一早睇穿歷屆港府拖得就拖、卸得就卸嘅DNA，前朝固然遺下大量爛攤子，搞到現屆政府施政頭頭碰着黑，但現屆政府咪又係照辦煮碗，將爛攤子留畀下屆，根本就係一擔擔。香港咁多年嚟經濟發展毫無寸進，競爭力跌跌不休，民生毫無改善，家陣知點解喇。