今日係年初四，學周星馳話齋：假又放完，錢又使晒，仲要返工添，點會有好面口喎。好彩今年例外，事關今日仲係公眾假期，市民仲可以玩多一日，唔使咁快出現「年初四咁嘅樣」，爽吖。
不過咁，市民爽皮嘅同時，執法人員仍然要堅守崗位，都咪話唔勞苦功高呀。好似入境處吖，淨係招呼嗰班假難民咋，已經周身唔得閒。事關唔少假難民好識走法律罅拖延留港，入境處經常被一鑊蹺起，有苦自己知。偽善政客仲要屈得就屈，反咬入境處拖延處理免遣返聲請，搞到假難民好痛苦喎，呢啲咪叫狗咬呂洞賓囉。
聽吓入境處助理處長（執法）馮伯豪點講吖。話說目前有數百名假難民被入境處羈押等候遣返，由於免遣返聲請好使好用，唔用就笨，咁就成為假難民玩嘢嘅開始嘞。有人會喺入境處審核聲請期間提出司法覆核，有人會以心理或精神上不適合會面為由拖延審核，有人仲會叻到睇完醫生唔同意診斷，甚至以私隱做擋箭牌，唔准入境處查閱醫生報告添。總之為咗賴死唔走，只有諗唔到，沒有做唔到，有人一拖就十年，有人滯留期間生埋幾個仔女，問你服未。
最谷氣嘅係，假難民恃住有人撐腰，投訴呢樣投訴嗰樣，連馮助理處長都忍唔住喊冤，話羈留中心設備齊全，既有醫護人員駐場，又有康樂設施，絕對唔存在唔人道嘅情況。喂，今時今日香港地想搵片瓦遮頭都難，假難民好食好住好招待仲要恩將仇報，有冇再無良啲吖，唔通真係整間五星級酒店畀你哋歎世界咩。
冇計嘞，香港就係有一班手指拗出唔拗入嘅反骨仔，係都要助紂為虐，最叻就係教假難民以所謂人道受損為藉口控告入境處，有個案獲判每日賠償一千元，亦有個案獲賠逾二十萬元，好過去搶，咁就難怪假難民蜂擁而至，源源不絕喇。
真係諗極唔明，假難民搞到香港雞毛鴨血，人神共憤，入境處出心出力，都係忠於職守，保障香港人利益啫，有啲人唔識感謝之餘，仲要鬧番轉頭，真係豈有此理。呢，淨係呢兩日咋，又有涉及假難民嘅傷人案及名店劫案發生，香港人連過年都不得安寧。入境處話就話增聘人手加快處理免遣返聲請，目標係今明兩個年度完成八千宗個案，但瘟神易請難送，入境處獨木難支，如果冇其他措施及部門配合，問題邊有咁容易解決吖。
所以話，要徹底杜絕假難民問題，辦法只有一個，就係退出國際公約，最起碼要設立禁閉營。假難民唔可以四圍走作奸犯科搵快錢咯喎，八人大轎抬都唔會嚟喇，港府聽到未吖？