潮流興講本土意識，有啲人講講吓扯咗去獨立自決，結果搞到家嘈屋閉，添煩添亂。不過如果講到保育傳統文化同技藝咯喎，全人類肯定舉腳贊成。
呢嗱，幾年前當局羅列咗四百幾項香港非物質文化遺產，經過一番篩選，日前終於揀出十個建議項目，包括港式奶茶製作技藝、盆菜、紮作技藝、中式長衫同裙褂製作以及薄扶林舞火龍等，推薦列入「香港非物質文化遺產代表作名錄」，稍後將會進行公眾諮詢，將來有可能申報為國家級非遺。
講真，呢啲嘢好多都係喺香港至有得睇，唔少外國遊客慕名而來，絕對值得好好保育。可惜吖，隨住現代人生活節奏愈來愈急速，加上唔係咁多後生仔女肯入行，好多傳統習俗同技術有湮沒之虞，有旗袍師傅話，依家啲年輕人除咗結婚根本唔會着長衫，好似佢哋呢批七、八十歲嘅已經算係「後生輩」，再咁落去好難有得搞。至於好似薄扶林舞火龍一類活動，雖然有過百年歷史，但一年淨係進行一次，唔似得舞龍舞獅咁長做長有，好難留住人才。
喺咁嘅環境下，將有關技藝納入名錄，增加公眾認知，無疑係一件好事，之不過淨係引起一陣圍觀係唔夠嘅，最緊要係官老爺有冇實際扶持措施。呢方面，港產官僚真係要向日本仔學吓嘢。人哋政府除咗將傳統能劇列入文化遺產，出錢出力培訓演員，仲將呢種古老劇種進行系統化記錄添。
不過嘥氣啦，官僚靠得住，豬乸會上樹。好似薄扶林舞火龍咁，聽聞都係靠民間自發保育，包括同大學合作拍攝紀錄片同搞口述歷史。又好似補鞋匠、鎖匠、線面師傅一類街頭特色工藝，歷史悠久得嚟各具特色，堪稱獨特嘅文化風景線，社會各界多年來一直要求保育，當局直至最近至話就發牌同設固定攤位進行諮詢，講到尾咪又係葉公好龍囉。
不過話又講番轉頭，庸官作為往往比不作為可怕。呢，港府幾年前公布過一份古蹟保育名單，當中七成係私人業權，因為冇提供足夠誘因鼓勵業主配合保育，結果弄巧成拙，古蹟消失得仲快過舊時。官僚唔保育猶自可，一保育衰多兩錢重，直頭同「死亡之吻」冇乜分別，係人都怕怕喇。
講起都唏噓，內地近幾十年飽歷戰亂及政治運動，「破四舊」破得七七八八，包括粵劇、長洲飄色等傳統文化反而喺殖民地嘅香港繼續承傳，成為香港獨有嘅特色同資產，估唔到依家啱啱掉番轉，國家領導人話要大力弘揚傳統優秀文化，反而港產官僚沉香當爛柴，都咪話唔諷刺！