「制服誘惑」係AV嘅永恒主題，但如果以為呢啲嘢只會喺電影發生，咁就大錯特錯嘞。呢嗱，話口未完，又有「刑警」──唔係，應該係「淫警」出沒害人，都咪話唔得人驚。
話說舊年喺上水有人用手機偷拍一名女子裙底，當場斷正被捕，原來條友唔係一般淫賊，而係休班輔警。呢單嘢最近有新發展，淫警嘅另一重身份係民政事務處行政主任，佢手機仲有大量收藏，搞到啲女同事人人自危，個個都擔心自己係受害者。鬼咩，警察喎，除暴安良保護弱小喎，女士們對住警察，戒心自然細啲，點知原來好眉好貌生沙虱，畀人睇晒着乜名牌底褲都唔知咩事。你知喇，呢挺人心理變態，自己滿足獸慾可能都未夠喉，分分鐘掟埋上網公諸同好，咁就大件事喇。
正所謂畫虎畫皮難畫骨，知人口面不知心，有啲人着住警服係正人君子，除咗警服即刻狼相畢露。至於嗰啲自制能力再差啲嘅，連放工除制服都等唔切，直接將警署當陽台，非禮性侵報案人有之，向同袍施祿山爪有之，要幾鹹濕有幾鹹濕，唔知嘅真係可能以為拍緊AVo架。有人話，警隊中人連自己身上支炮都管唔住，容乜易另一支炮向住市民亂咁射，絕對唔係杞人憂天。警隊民望喺紀律部隊中包尾大幡，黑警個朵傳到街知巷聞，家陣知點解喇。
講到呢度，功夫茶不期然諗起早前警隊舉行冬季招聘，結果人數破晒紀錄，但係奇怪嘅係，傳媒訪問應徵者，一個二個左閃右避，似乎有難言之隱。即係咁，應徵者當中肯定有唔少人想服務社會，但都唔排除有人有啲特殊癖好，諗住着咗警服就可以作威作福，欺壓良善、飽嘗獸慾都方便啲。冇計喇，上樑不正下樑歪，高級少少嘅警官對住女下屬，口水都流埋，唔係乘機抽水就係傳淫照性騷擾，細嘅難免有樣學樣，好人好姐入咗呢個大染缸都會變壞喇，係咪？
香港本來係安全城市，家陣變咗妖獸都市，之所以搞成咁，皆因喺啲淫警眼中只有豐乳肥臀，點會見到犯罪分子吖。而從中醫角度嚟講呢，縱慾過度會導致腎虛，精神不振兼夾筋骨萎軟，犯罪分子橫行霸道，特別係假難民犯罪兵團更加係有恃無恐，幾乎踩沉香港，除咗可能有警隊高層包庇，班差人個個腳仔軟，想捉賊都無力喇！
咁就難怪警隊中人戀英崇殖嘞，你幾時見過事頭婆年代警隊好似今日咁冇規冇矩，七國咁亂o架！計功夫茶話齋，淨係請英國佬教儀仗步操唔夠嘅，直接禮聘佢哋返嚟做一哥仲好過喇！