咪睇建制派同反對派平時狗咬狗骨、勢不兩立咁款，其實都有同仇敵愾嘅時候。邊個咁犯眾憎？之唔係港府囉。
嗱，雖然邊個跑出做特首仲係未知之數，但港府已急不及待整定個架步畀未來候任特首使用。本來呢，下任特首將於三月底選出，七月一日至正式上任，呢段期間成立候任特首辦係無可厚非，過去亦有慣例，之但係當局洗腳唔抹腳，唔豪唔租，唔靚唔用，唔貴唔要，係都要租用中環過萬呎甲級寫字樓，三個月貨仔之嘛，使費高達四千萬元，直頭豪華行宮咁款。離譜成咁，各黨派議員唔聯手鬧爆至奇喇。
面對群情洶湧，曾要求「包容」庸官嘅政制及內地事務局局長譚志源，梗係例牌要求「包容」豪華候任特首辦啦，佢話喎，由於政府未能喺中環及金鐘一帶搵到合適嘅政府物業，所以要租用商用辦公室喎。至於條數點計嘅呢？辦公室裝修及還原費約一千七百萬元，租金約一千三百萬元，其餘就係人手開支等，譚局長仲強調編制人手同上屆一樣，冇多冇少添。
既然高官用上屆作比較，咁就不妨睇真啲。上次梁振英當選後，候任特首辦嘅開支係八百萬元，地點係舊政府總部，唔使交租，即係話今次開支暴增近五倍。既然上次候任特首辦設喺舊政總，點解今次唔照辦煮碗呢？就算舊政總撥咗畀律政司使用，之但係騰空一間辦公室並唔係移山填海咁困難，何況只係佔用短短三個月，唔通咁都做唔到？最離譜係裝修費仲貴過租金，仲要呢頭裝修完，嗰頭還原番，好似啲錢唔係錢咁，兼製造大量建築廢料，簡直折墮。當局仲要簽晒租約先至唧牙膏式知會立法會，擺明先斬後奏，民怨沸騰就係咁解。
講真，港府大花筒早就唔係新聞嘞，每年淨係租用甲級寫字樓嘅開支已高達十億元，仲要呢啲部門幾乎都係閂埋門辦公，唔使接觸市民，好似候任特首辦咁，無非處理交接工作，根本冇需要租用黃金地段，你話班官唔係倒米都唔得喇。
最惡頂係，港產官僚善財難捨，冤枉甘心，為咗自己虛榮享受，公帑係咁掟落鹹水海，連眉頭都唔皺一下，叫佢哋扶貧紓困，還富於民喎，就牙痛咁聲，一時話「審慎理財」，一時話「量入為出」，再唔係就搬出「結構性財赤」恐嚇市民。如果當局真係審慎理財，審計署就唔使年年發表報告狠批佢哋浪費公帑喇。
計功夫茶話齋，最冤枉都係納稅人。特首由小圈子選舉已經夠衰，仲要未上任先擺官威，使錢好似倒水咁。當局係都要與民為敵咯喎，咁就唔好怪人逢政府必反喇。