奶媽除咗係一門古老職業，仲係家吓最熱嗰位特首參選人嘅花朵添。之所以有呢個寶號，皆因官場太多揦手唔成勢嘅裙腳仔，冇咗奶媽就企咗喺度乜都唔識做。照咁睇，香港警隊嘅奶媽肯定係大英帝國前主子嘞。
點解咁講？好簡單，自從英國佬捲鋪蓋返回老家之後，香港警隊嘅水平就直線插水，一流變九流。呢，淨係舊年咋，廉署接獲八百多宗涉及政府部門嘅貪污舉報，警隊就佔咗三分之一，冠絕同儕，呢啲唔係墮落係乜吖？咁仲唔止，警隊醜聞長爆長有，唔係性騷擾女下屬就係砌無辜市民生豬肉，唔係高買就係監守自盜，唔係受賄洩密就係警匪一家親，法庭仲試過一日內連審多宗涉及現役警員知法犯法嘅官司添，真正係沒有最醜，只有更醜。
最諷刺係，警方早前重金禮聘英軍回魂教儀仗，擺明冇咗英國佬就連步操咁基本嘅嘢都唔識，童子軍都分分鐘醒過佢，你話唔唱番首「世上只有奶媽好」點得吖。唔怪得「東方報業民意調查」嘅受訪者都話，警隊知法犯法，烏煙瘴氣，擔心香港治安愈來愈差。咁又係呀，連步操都要英國佬教小學生咁教，到底呢班人民公僕仲識唔識捉賊，真係唔到市民唔擔心㗎。
開講都有話，一個地方老鼠為患，啲貓唔係病咗就係懶惰。大家有眼見，南亞兵團心狠手辣，愈來愈猖獗，今年只係過咗十幾日咋，已經頻頻犯案，由劈友到強姦再到搶劫乜都齊，偏偏冇一單破案，如果警方唔係欺善怕惡，甚至提供包庇，講都冇人信喇。最弊家陣唔止南亞兵團作惡，仲有貴州幫來港搵食，加上本地犯罪分子橫行，指望警方保境安民喎，隨時死得。呢嗱，咸豐年前嘅新界更練團最近都要重出江湖，家陣知點解喇。
冇計喇，警隊一味崇英戀殖，嗰頂皇冠警帽到家陣都仲有警官戴出嚟獻世，冇咗英國佬耳提面命喎，連印個賀年揮春都可以白字連篇，仲識做啲咩吖。最眼冤係英國佬廉潔奉公佢哋一成都學唔到，內地官場嗰套擦鞋文化就學到十足十，早排有指揮官搞退休騷扮皇帝，成班夥計紛紛化身清宮太監或妃嬪宮女，嗰副奴才相，睇怕李蓮英翻生都自嘆不如。至於唔少大Sir退休後冷河都唔過，仆倒去服務大財團嘅例子更係屢見不鮮，受訪者大鬧警方禮崩樂壞、不務正業，就係咁解囉。
回歸不過二十年，警隊就腐化成咁，香港仲有乜資格自詡安全及廉潔城市吖。計功夫茶話齋，下屆特首邊個做都好，最緊要整頓警隊，清理門戶，掃除枯枝垃圾，否則講乜都係假。