開講有話︰食得唔好嘥，老人家更加教落，浪費食物會遭天譴。呢嗱，尋日大年初八，喺屯門就有大批過期食物被棄置，引發街坊瘋搶，咪就係覺得粒粒皆辛苦，棄之可惜囉！
話說屯門一個垃圾收集站尋日聚集大批群眾，原來有人喺社交網站上載圖片，話該處有幾板薯條被棄置，雖然過咗期幾日，但仍然食得。消息一傳十，十傳百，有人呼朋喚友，有人一家大細出動，有人更出動手推車甚至大卡車到場掃貨，直頭趁墟咁款，結果唔使個半鐘就掃到一乾二淨。據垃圾站職員講，嗰度耐唔時都會有類似「筍貨」出現，只不過今次有人放上網至咁熱鬧啫。
係人都知，好多預先包裝食物只要未拆封，即使啱啱過咗「最佳食用日期」，質素大致冇問題。查實外國好多地方都有環保組織聯群結隊喺垃圾桶摷「可用物資」，只不過因為香港人比較保守，又怕難為情，所以唔流行呢家嘢，咁就難怪一旦有人唔執輸瘋搶，就立即成為新聞喇。
如果話市民瘋搶棄置食物係環保，咁棄置食物嘅商家唔單止浪費，仲增加堆填區負擔，呢種行為點止唔值得鼓勵，直頭要大聲譴責。講真，如果食品就快到期或者啱啱過期又賣唔出，最正路梗係捐畀慈善機構，轉交有需要人士。早排有社福機構估計全港超過三萬基層市民三餐不飽，要靠「食物銀行」接濟，部分人即使接受食物援助，都仲要食少餐至維到皮，需求之大可想而知。
有人為三餐不繼發愁，有人將大批食物棄置，呢啲咪就係香港貧富懸殊嘅寫照咯。一直以嚟，廚餘都係堆填區最主要嘅都市固體廢物類別，而且數量仲不斷增加，由十五年前每日不足四百公噸，大幅增加至今時今日嘅逾八百公噸，都咪話唔嚇人。如果唔係，港府就唔使大拿拿花十幾億元，喺小蠔灣興建廚餘處理中心喇。
話時話，民間對惜食嘅概念的確有所提高，有食肆少飯減一蚊，有食肆容許客人自行按飯量裝飯，亦有餐廳按訂枱數量預備食材，盡量減少浪費，問題係，環保人人有責，民熱官冷效果始終有限。舉個例吖，人哋美國紐約市政府幾年前就強硬要求餐廳減少一半廚餘；加州亦強制每年生產超過二百公噸廚餘嘅食肆必須進行回收，反觀港府，口口聲聲重視環保，但回收幾十年如一日，到依家仲係停留喺三色桶嘅最原始階段，廚餘回收率得百分之一咁大把，簡直笑大人個口。
點講都好，環保唔止嗌口號，而係要實際行動，市民同商家要惜食，港府更加要惜食，繼續帶頭暴殄天物，因住畀雷劈吖！