快樂嘅時光過得特別快，新春假期話咁快就講Bye Bye。話時話，今個新年真係幾開心，唔止車公賜予香港上籤，去年搞到六國大封相嘅旺角夜市亦冇再出亂子，市民仲可以一嘗久違嘅篤魚蛋滋味，都咪話唔爽。
即係咁，做得小販嘅都係基層市民，出得嚟擺檔嘅無非想發筆新年財，冇人想搞寸Party嘅，官老爺今次手下留情，淨係派執法人員從旁維持秩序，冇話趕盡殺絕，咁咪皆大歡喜囉。淨係旺角朗豪坊對出嘅夜市咋，連日吸引大批市民光顧，個個都食到讚不絕口，話有風味又夠熱鬧喎。而深水埗及新界北區都有類似嘅夜市小販檔，一樣人聲鼎沸，大受歡迎㗎。
講開又講，街頭熟食可以話係香港嘅傳統風味，可惜隨着社會發展，呢種傳統風味近年幾乎絕迹，加上地產獨大，租金高企，好多小販無力上舖開檔，想自食其力都唔容易。呢，舊年嘅旺角暴亂，雖然係有人借題發揮存心搞事，但如果唔係官老爺對小販喊打喊殺，授人以柄，想搞事都冇藉口啦。嗱，今年當局就醒嘞，冇再鐵腕掃蕩，結果咪人人開心囉。
不過咁，夜市旺場就夠旺場嘞，可惜唔少小販就認真唔識做，將大量垃圾丟喺街邊，自己就拍拍屁股走人。好似旺角咁吖，垃圾堆積如山，由山東街綿延至亞皆老街，加上一直落住毛毛細雨，雨水溝污水，流到一地係。最慘都係清潔工人，連日執垃圾執到手軟，卒之要天光至將市面回復原貌，唔辛苦就假。
仲有呀，同樣情況一樣見於其他地方，好似北區吖，夜市過後滿地垃圾，烏煙瘴氣，鼠輩就高興咯，但網民就睇唔過眼，大鬧冇公德心。咁又係呀，小販係基層，清潔工人更係基層中嘅基層，佢哋冇得發新年財之餘，仲要幫小販執手尾，做到有氣冇碇抖，咁即係將自己嘅快樂建築喺別人嘅痛苦之上啫，有冇再自私啲吖。
講到呢度，功夫茶又諗起唔少香港人最鍾意鬧內地人冇公德心，之前仲搞出連串驅蝗光復鬧劇，好似香港人高人一等咁款。但現實係點呢？夜市小販夠係香港人喇，咪一樣自私自利，一樣唔講文明。所以話啫，內地人有劣根性，香港人亦好唔到去邊，笑人哋同笑自己冇乜分別嘅咋。
點都好，新正頭無非求個好意頭，一年一度搞吓小販夜市，熱熱鬧鬧，開開心心，大部分市民都會支持，但唔該小販自己亦要自律，唔好得意忘形，否則市民對小販嘅同情心耗盡，到時佢哋畀官老爺又拉又鎖，咁就唔好怨咯。