老一輩人話齋，一命二運三風水，有時真係唔到你唔信(口架)。好似香港咁吖，過去風調雨順，被視為福地，點知近年霉運纏身，社會愈來愈亂，港府權威盡失，就連港獨呢啲異端邪說都甚囂塵上，如果話風水出咗問題，雖不中亦不遠咯。
嗱，淨係西九故宮文化博物館咋，本來係中央趁住香港回歸二十周年送出嘅大禮，國內其他城市恨都恨唔到，點知竟然鬧到滿城風雨，仲被上綱上線為文化統戰同洗腦，簡直好心遭雷劈。當然啦，港府官僚黑箱作業，事前冇諮詢，事後又跪低，的確係授人以柄，反對派不嬲唯恐天下不亂，逢中必反，故宮館爭議被放大，一啲都唔出奇。
不過一個巴掌拍不響嘅，撇除人為政治因素，中央送故宮館畀香港係咪恰當禮物，亦好值得商榷。正所謂，天無二日，土無二王，家無二主，尊無二上，一個國家唔可能同時有兩個君主，否則就會天下大亂。同樣道理，北京故宮作為象徵王權同最高權力嘅地方，係咪好應該只此一家，別無分店呢？將權力中心一分為二甚至一分為三，咪即係同自己過唔去？
堪輿學家係咁講嘅，北京故宮博物院前身係明清兩代王宮紫禁城，同王權密不可分，一個國家只能有一個權力中心，多過一個就係「分龍」，唔止唔好意頭，仲會搞到政出多門，各自為政添。有史為鑑(口架)，當年國民黨政府退守台灣時帶走大量故宮文物，之後設立台灣故宮博物院，唔少台灣人至今自認係正統，結果搞到兩岸對峙幾十年，到家陣都未能統一唔在講，台獨仲愈演愈烈添。香港仲要學人整多個分館，一國三宮咯喎，咁咪即係三分天下，仲成世界嘅？
所以話，玄學嘅嘢，寧可信其有，不可信其無。西九故宮館未正式啟動已經搞到家嘈屋閉，有人擔心一旦落成，香港將步台灣後塵搞獨立，令港獨逆流更難收拾，並唔係杞人憂天(口架)。你知啦，家陣港獨台獨有合流之勢，縱然畀人鬧係漢奸賣國賊，但仲以為「巧威威」咁款，就知港獨呢味嘢已經喺香港生根，中央再送多個「權力中心」畀香港喎，嫌香港仲唔夠亂咩。
其實就算唔講風水玄學，淨係講外國先例吖，都唔會有國家將權力中心斬件放喺唔同地方，正如克里姆林宮只有一個，白宮亦唔會有分館一樣。計功夫茶話齋，本來無一物，何處惹塵埃，與其煩惱自尋，不如將故宮館計劃擱置，學澳洲悉尼布朗格魯保護區咁，將西九劃作綠化休憩地帶，畀市民偷得浮生半日閒咪仲好！