今屆政府成日將「扶貧」當作政績咁吹，特別係嗰位挾上主旨意等住入閘選特首嘅高官，更加牙斬斬扶貧助弱，共享成果係佢強項，話取得唔少「破天荒」嘅「創舉」喎，真係唔知嘅就畀佢嚇死，知嘅就畀佢笑死。
唔使講第樣，齋講基層子弟嘅慘況就夠。有團體訪問超過二百個基層家庭，結果發現近四成家長未能為子女提供至少一日兩餐有肉或魚，超過一半家長未能負擔每日至少一杯牛奶或豆漿；咁都未算，四成家長表示冇錢買衫，小朋友所有衫都係二手嘅，問你怕未。
香港話晒都係富裕社會，基層兒童居然缺衣少食，唔知嘅仲以為係第三世界，唔通呢啲就係高官口中嘅扶貧「創舉」？話時話，清貧學生「冇啖好食」，其實並唔係今時今日嘅事。記得幾年前有小學推出「交齊功課換食物」計劃，學生只要有好表現，就可以免費獲取午餐肉及其他罐頭食品，結果唔少學生果然脫胎換骨，證明對好多清貧子弟嚟講，罐頭食品已經係珍饈百味囉。
唔怕唔識貨，最怕貨比貨，同樣係富裕社會，人哋日本早喺百幾年前明治維新時期，已經為學童提供營養午餐，甚至由教育大臣親自制訂相關衞生管理準則；即使貧窮如印度，亦早喺十年前推行免費校園午餐制度，難為香港成日自詡國際大都會，連印度都不如，班官究竟知唔知個「醜」字點寫？
當然喇，港府扶貧講多過做，基層兒童點止食唔飽着唔暖咁簡單？上述調查發現近半家長無能力為子女購買電腦；六成兒童欠缺適合溫習同做功課嘅空間；至於負擔得起興趣班以及補充練習嘅，更加係少之又少。班高官一個二個住洋樓飲紅酒，可能唔知窮人家連電腦都冇嘅困境，小朋友好多時要趁小息借用校內電腦，又或者用公共圖書館電腦做功課，限時限刻，趕頭趕命，點會有好成績？
一節見則百節知，窮家孩子輸在起跑線上，屋企有錢嘅可以讀國際學校、直資學校，接受最優質教育資源，窮人只能自求多福，睇吓八大資助院校過去十年學額有所增加，但獲得助學金嘅學生人數比例反而不斷下跌，就知發生咩事。正如有人話齋，教育嘅唔公平係最大嘅唔公平，基層子弟冇法子憑知識改變命運，只能夠遺傳上一代嘅貧窮，當愈來愈多年輕人上流無望，社會唔亂到七彩至奇！
始終都係嗰句︰為政不在多言，顧力行何如耳。一眾疑似特首候選人與其探訪社企瞓劏房，一味做親民騷，不如認認真真度吓點樣增加資源，真正幫助弱勢社群好過喇！