大年初一，功夫茶恭祝各位讀者新年進步，萬事如意。正所謂除舊迎新，唔單止個人新年要有新氣象，負責維持社會治安嘅警隊醜聞多多，更加需要有新氣象，係時候嚟番場徹徹底底嘅大掃除喇！
啱啱之嘛，三名反黑警官及警員涉嫌收受利益包庇娛樂場所，其中有人更加係警司級高層。警隊高層同黑幫勾勾搭搭，包娼庇賭，又食又拎，實行警黑一家親，市民仲以為睇緊穿越劇，返番去上世紀五、六十年代添。正如出席「ontv東網電視」時事評論節目嘅立法會議員話齋，警隊醜聞長爆長有，專業形象早已一鋪清袋，「一哥」盧偉聰應該問責落台；亦有議員響應，話會喺立法會招呼佢老哥。
除咗立法會議員，唔少網民亦要求一哥問責。又難怪嘅，警隊由一流淪為九流，一哥作為最高話事人，負有主要領導責任，無可能置身事外。可惜吖，警隊高層同其他港產官僚一樣，永遠唔會反躬自省，千錯萬錯總係別人嘅錯，佢哋尋日畀人踢爆下達內部指令，要求前線謹言慎行，話「部分傳媒非常渴望找出警隊更多錯誤」喎。
乜呢位高層冇聽過「無鬼唔死得人」咩？收犯罪集團利益通風報信、監守自盜、非禮同袍、性侵報案人、返工時間上鹹網……全部珍珠冇咁真，並唔係傳媒特登搵佢哋痛腳。講真，傳媒同廣大市民一樣希望天下太平，一樣唔想報道警隊醜聞，問題係警隊衰嘢好似井噴一樣，想撳都撳唔住，傳媒為民喉舌，揭露社會陰暗面，只不過盡番第四權本分咁解啫。
最得人驚嘅係，警方高層到依家仲好似發緊夢咁，以為只要做下門面工夫，就可以挽回市民信心。睇番份指令，要求警員唔好遲到，唔好喺當區酒吧消遣，注重儀容唔好染髮，男同事唔好戴耳環，全部都係細眉細眼嘢。喂，家陣連《有種罪犯叫休班警察》呢類書都賣到開巷，證明喺好多市民心目中，警察已經係「黑社會」同「罪犯」嘅代名詞，唔係以為執靚啲個賣相就可以過骨下話。
不過大家都唔好抱太大期望咯。面對警員被捕人數連年上升，一哥唔係反躬自省，攝高枕頭諗吓執番正內部管理，而係臭屎密冚，大玩數字遊戲企圖瞞天過海。至於回歸後嘅五位前一哥亦唔好得幾多，四位退休後泊咗商界大孖沙碼頭。你哋話嘞，高層一個二個掛住為退休後搵真銀鋪路，邊有時間做正經嘢吖。警隊近年形象不斷插水，長踞紀律部隊民望包尾大幡，家陣知點解喇。
早排警隊咪禮聘英國佬教儀仗步操嘅，查實警隊管理爛到入心，唔掂嘅何止儀仗步操，再咁落去，怕且要請埋英國佬返嚟做一哥至得。