特首跑馬仔正式開鑼，政壇一下子熱鬧起來，現屆政府淪為看守政府，唔少高官心大心細，想投靠又唔知邊個係真命天子。好似教育局局長吳克儉咁吖，自我感覺良好，仲化身王婆賣瓜，自賣自誇，應該都係博有人睇上佢啫。
嗱，吳克儉平時出席立法會雖然經常冇坐足全場，但講到玩FB咯喎，就非常之有耐性，趁住港府發表施政報告，佢老哥亦一口氣連發十貼，好似數白欖咁數晒上任以嚟多項「政績」，包括科技教育、高等教育、生涯規劃、多元學習需要等，仲沾沾自喜話香港有五間大學躋身二○一六年泰晤士高等教育世界大學排名榜前二百名，又話成功將中史列為初中必修學習領域，唔知嘅真係想讚佢一句勞苦功高o架。
可惜吖，自吹自擂係冇用嘅，係龍係蛇大家有眼見。冇錯，本港大學係就係經常榜上有名，弊在排名跌跌不休，淨係港大咋，就試過喺一個國際排名榜暴跌四十幾級，認真羞家，吳局長一味隱惡揚善，唔通唔怕笑大人哋個口嘅？再講吖，本土思潮氾濫，港獨甚囂塵上，年輕一輩對中國人嘅認同感每況愈下，都喺本屆政府任內發生，教育失敗已經寫喺牆上，吳局長難辭其咎，如今中史科列為初中必修科只不過係補鑊咋，難為佢老哥仲好意思當政績自誇，簡直唔知醜字點寫。
當然啦，吳克儉有名你叫「唔得掂」，教育爛帳又點止呢啲吖。好似TSA爭議咁，連小學生都要走上前台控訴，打破年紀最細出席立法會嘅紀錄；又好似學童自殺潮咁，一句學生冇做好生涯規劃就關人個關，被人鬧為涼薄就係咁解。至於免費幼稚園教育又係搞到唔湯唔水，擺明取巧啫。吳局長學人晒十大政績求連任喎，根本就係自暴其醜，話係十大罪狀就差唔多。
不過咁，愚者千愚，必有一得，佢老哥搞教育唔在行啫，講到旅遊外訪咯喎，佢認第二，冇人敢認第一。有數得計，淨係去年出國考察已多達十五次，冠絕所有司局級官員，足迹遍布七大洲五大洋，想唔認係旅遊達人都唔得喇。天生我材必有用，吳局長對於賞楓葉、（目及）靚女咁有心得，將來冇官做都冇有怕，改行做旅遊節目主持人，分分鐘撈得風生水起，有得諗（口架）。
講到呢度，大家知點解現屆政府民望低殘，一事無成，原因之一咪就係管治班子拉雜成軍，廢官當道咯。所以話，下屆政府邊個做特首都好，最緊要帶眼識人，唯才是舉，千祈咪再將下欄當上菜、次貨當係寶吖。