本屆政府冇嘢叻，最叻就係開空頭支票，「走數政府」個朵可謂實至名歸。彈票走數都算嘞，市民追數，官老爺居然厚顏到倒打一耙，怨天尤人，呢啲咪就係無恥者無敵囉。
話說港府上個月公布長遠房屋策略周年報告，顯示建屋速度嚴重不達標，十年房屋大計隨時破產，激到無殼蝸牛生蝦咁跳。立法會尋日討論相關議題，運房局局長張炳良自然成為眾矢之的。你估佢老哥點拆彈吖嗱，佢話政府未來十年可以發展嘅土地有限，房委會亦已經用盡手上嘅熟地發展公營房屋，呼籲社會要咬緊牙關，作必要取捨。佢仲話，房屋同土地供應已經到達臨界點，希望社會各界共同面對艱難挑戰，上下一心，爭取更多空間解決問題喎。
將張局長呢番官話翻譯成人話，即係話政府應該做、可以做嘅都已經做晒，千錯萬錯都係社會嘅錯，係市民冇「上下一心」嘅錯，官老爺何止稱職，直頭係鞠躬盡瘁，死而後已。
冇錯，房屋問題困擾香港多年，特別係上手曾爵士任內hea足七年，問題更加係積重難返。但係本屆政府上台嗰陣，唔係拍晒心口話乜嘢解決房屋問題係重中之重嘅咩，唔係話「地從何來」係假命題嘅咩，到依家又話熟地用完，新地難尋，唔係自打嘴巴又係乜嘢？如果房屋問題唔係難啃嘅骨頭，求其搵牛頭角順嫂搞都得喇，使鬼每個月出廿幾三十皮請你哋呢班廢官咩？
事實勝於雄辯，今屆政府口口聲聲「寸土必爭」、「見縫插針」，實際上得個噏字，嚟嚟去去獨沽一味放「辣招」，結果樓價愈壓愈高，上樓難上加難。尋日有調查顯示，市民置業指數再創新低，咪就係對港府房屋政策投下不信任票囉。
對於一般香港人，置業固然係遙不可及嘅夢想，想話退而求其次住公屋一樣等到頸都長，話就話三年上樓，排足十年八載嘅其實大有人在。港府黔驢技窮咯喎，惟有再打收緊公屋富戶政策嘅主意，希望加快騰出單位。即係咁，公平分配社會資源，冇人會反對，但以為咁樣就可以增加供應，咁就太傻太天真嘞。正如有人話齋，被叮走嘅富戶數量有限，對輪候大軍嚟講連杯水車薪都不如，反而可能變相製造更多人投入租務市場，提高租金價格，適得其反添。
呢嗱，特首選戰開鑼，各路疑似候選人爭住做騷，瞓啱啱容身嘅棺材房亦在所不惜，懶係關心民間疾苦咁款。可惜港產政客講就天下無敵，做起上嚟次次都係無能為力，五年前嘅慘痛教訓，大家應該記憶猶新o架。