美國總統特朗普一上任就動作多多，當中最矚目嘅梗係簽署行政命令喺美墨邊境興建圍牆，堵截非法入境者啦。雖然有關做法好有爭議，但起碼佢係找數真漢子，講得出做得到，點都好過走數當食生菜嘅港府多多聲吖。
唔係咩，假難民問題搞到香港雞毛鴨血，港府把口就話正視問題，實際上一味紙上談兵，去年施政報告話要研究設立禁閉營及考慮退出國際公約，今年施政報告重彈舊調，咁即係點？即係煲冇米粥囉。好彩仲有政府部門肯做吓嘢，入境處處長曾國衞尋日公布該處去年處理及打擊假難民嘅連串數字，可以話係「有所作為」㗎。
先睇吓假難民打黑工幾咁猖獗吖。入境處去年出動近六百次，較前年勁升七成，合共拘捕四百八十多名非華裔黑工，較前年激增兩成三；又拘捕近三百名本地僱主，較前年暴增四成五，證明一個巴掌拍唔響，如果唔係呢班本地僱主知法犯法，手指拗出唔拗入，假難民又點會源源不絕湧港搵食吖。喺假難民眼中，香港簡直遍地黃金，幾好都有，唔捨得走就係咁解。
仲有喎，入境處去年聯同本港及內地執法部門採取四次行動，成功瓦解四個人蛇集團，拘捕二百多名涉案人士。入境處仲出訪假難民主要來源地，同當地政府聯手打擊，最近更對印度籍旅客實施網上預約制度，防患未然，真係做咗唔少嘢o架。
不過咁，道高一尺，魔高一丈，只要來港誘因仲喺度，只要有錢可搵，假難民潮係唔會停止嘅。大家有眼見，實施入境管制措施後，被捕嘅南亞人蛇數目雖然較前年大幅下跌，但從內地偷渡來港嘅南亞人蛇就大幅上升，反映內地已成假難民嘅偷渡跳板，亦印證本報所講，內地打擊不力，香港慘成排污馬桶，入境處幾賣力都係事倍功半嘅咋。
冇計嘞，有班偽善政客助紂為虐，港府又船頭驚鬼船尾驚賊，既怕畀人話唔人道，又要扮好人，結果縛手縛腳乜都做唔到，淨係識一味增加資源加快審核，最近仲話要再花錢成立秘書處專門招呼假難民添。其實係人都知，假難民無窮無盡，而香港係彈丸之地，資源多極有限，港府以有涯隨無涯，死得喇。家陣本港罪案頻生，由偷呃拐騙到強姦非禮再到黃賭毒，瓣瓣都有假難民嘅身影，外媒當年話「香港已死」，咪就係死於港府假仁假義囉。
正所謂非常時期用非常手段，特朗普雖然號稱狂人，但勝在強調「美國利益優先」，反難民反偷渡立場鮮明。最鍾意將外國先例掛喺口邊嘅港府，唔知幾時至會學會「香港利益優先」呢？