養兒一百歲，長憂九十九。喺父母心目中，子女永遠都係小朋友，特別係智障人士，佢哋生活自理能力有限，一旦兩老先走一步，邊個照顧係一個頭痛問題，你話父母唔憂心就假嘅。
唔講唔知，原來依家全港有十萬名智障人士，有大學就舊年施政報告提出為有需要人士成立公共信託進行調查，發現超過九成智障人士家長冇立遺囑或者授權書，超過一半家長搵唔到合適監護人，而為仔女成立私人信託嘅家長只有百分之五咁大把。受訪家長當中好多都首選由政府監察、家長以及專業人士組成嘅新慈善組織，又或者係政府監察嘅現有知名慈善組織。
可憐天下父母心，尤其係有智障仔女嘅父母，邊個唔擔心喺自己百年之後仔女點樣生活吖，邊個唔想一早作出妥善嘅財務安排吖，可惜現實就係咁殘酷。好似有位女士咁，佢今年六十幾歲，丈夫啱啱過世，患有唐氏綜合症嘅女兒三十出頭，雖然可以自己出入同簡單煮食，但對金錢管理毫無概念。佢試過查詢銀行有關信託基金詳情，對方嫌銀碼唔夠大，加上要收額外手續費，令佢最終卻步。
即係咁，銀行在商言商，計過度過冇肉食，唔願意接都係人之常情，呢個時候就好需要政府介入。問題係，呢個政府涼薄到冇朋友，最新數字顯示，目前輪候資助殘疾院舍嘅人數首次突破一萬大關，其中嚴重弱智人士輪候時間更加去到十四至十六年。退而求其次入住私人院舍咩，政府又冇監冇管，性侵虐待等醜聞長爆長有。家居照顧咯喎，當局又乜嘢支援都冇，以致耐唔時就傳出老人家喺屋企失救，智障子女伴屍幾日嘅人間悲劇，簡直聞者傷心，聽者流淚。
講真，以港府覓地建屋嘅蝸行龜步，旨意佢起多啲智障人士院舍，蚊都瞓蛇都死。為佢哋設立信託基金就唔同嘞，用得呢個服務嘅，好多父母都可能有番些少積蓄，又或者有層樓留低，講得難聽啲，政府頂盡都係出豉油啫。再講吖，人哋新加坡等地方已經行之有效，由政府設立公共信託基金，承擔交託團隊管理基金嘅運作費、行政費等，並且接受智障人士家長嘅資金以及進行投資，港府「拿來主義」就得喇。
講到底，為智障人士成立信託基金，真正幫到社會上弱勢中嘅弱勢，而且花費公帑唔多，斷估亦唔會有政客阻頭阻勢。勞福局局長張建宗最近吹風，話政府屬下委員會正討論相關議題。嗱，打鐵就趁熱喇，江湖傳聞你老哥下屆更上一層樓，點都要交番少少成績表喇，下話！