施政報告啱啱出爐，財政預算案下個月就會登場，有冇料到仲要睇過至知，但幾乎可以肯定嘅係，港府今年又估錯數，預算案淪為「失算案」，簡直笑大人個口。
呢，有會計師事務所預計一六/一七財政年度嘅盈餘係七百五十億元，足足比港府原先預計嘅一百多億元多出逾六倍。對於前財爺鬍鬚曾過去八年次次都估錯數，會計師就話同佢估算風格保守有關，希望本身都係會計師出身嘅繼任財爺陳茂波可以估準啲咁話。
講真，鬍鬚曾有名你叫「史上最廢財爺」，關咩保唔保守事吖。冇錯，市場非一成不變，加上政府盤數又咁大，預算同實際情況有些少出入一啲都唔出奇，問題係幾百億甚至千億上落，係咪太離譜先？再講吖，呢啲唔係一、兩年嘅「意外」，而係年年如是，除咗「廢」之外仲有咩解釋？咁嘅算術水平，請個小學生都得啦，使鬼出幾十萬一個月人工請佢咩！
大家有眼見，鬍鬚曾呢個守財奴最叻就係玩狼來了，一味用「結構性財赤」恐嚇市民，再唔係就玩數字遊戲，成立乜基金物基金一類嘅小金庫，叫佢還富於民好似食佢隻車咁，市民嘈得犀利，至係咁意派糖敷衍一下，而且好多都係一次性措施，甜吓喉嚨都唔夠。
喺鬍鬚曾管數之下，政府財政儲備豬籠入水，由阿松年代足夠應付十二個月經常開支，增加到依家二十四個月，已經唔係「量入為出」咁簡單，而係「多入少出」甚至「有入無出」。冇人話積穀防饑唔啱，但有咩危機需要動用咁多儲備去應對呢？唔通對市民斤斤計較，慳埋慳埋就係為咗確保鬍鬚曾之類嘅高官，退休後可以印印腳咬長糧？
香港社會問題千頭萬緒，其中最主要原因就係基層市民分享唔到經濟發展成果，社會上升通道堵塞，本來呢，港府彈藥充足，照計可以喺扶貧紓困、發展高新產業以至鼓勵創業等方面有一番作為，最低限度都應該學吓隔籬澳門咁還富於民，可惜香港人唔好彩，偏偏遇着個孤寒財主，結果財政資源浪費咗，發展機遇蹉跎咗，競爭優勢消失咗，「史上最廢財爺」個朵咪咁嚟嘅囉。不過冇所謂喇，好多香港人好善忘，只要肯懶幽默搞爛gag，去大牌檔整番碟豆腐扮吓親民，即刻可以盡棄前嫌，依家鬍鬚曾嘅民望領先其他競爭者，甚至成為下屆特首大熱門添！
當然喇，有啲人都係唔好咁快開心住，事關打錯算盤呢家嘢好邪，財政預算可以估錯，難保選情唔會估錯，都係嗰句，政治一日都嫌太長吖。