每年「十一」黃金周都係旅遊業界大賺人仔嘅時候，可惜今時唔同往日，中港矛盾日益尖銳，愈來愈多內地旅客放棄香港，業界係時候諗吓計搵新客源啦。本來呢，隨住啟德郵輪碼頭第二個泊位正式啟用，帶嚟一批高消費力嘅生力軍，都算不無小補，弊在碼頭設施甩甩漏漏，配套殘缺不全，莫講話吸客消費，唔趕客已經偷笑咯。
呢嗱，新泊位開張大吉冇耐，日前迎來第一艘郵輪「藍寶石公主號」，再加上尋日泊岸嘅「海洋航行者號」，一共有超過五千名旅客，照計的士業同碼頭裏面嘅食肆應該笑到見牙唔見眼至係，不過事實啱啱相反，有飲食集團負責人大吐苦水，話雖然第二泊位啟用，但碼頭好多配套設施仍有待發展，對吸引更多郵輪客信心一般，未來會轉攻本地同婚宴客咁話。
的士大佬嘅情況都唔好得去邊。郵輪「瑪麗皇后二號」早前來港，的士排隊超過三粒鐘，司機見過鬼都怕黑，一度計劃杯葛碼頭，後來都係當局補鑊派發隧道代用券，先至勉強肯載客。又難怪嘅，司機去到碼頭得個等字，固然手停口停冇啖好食，接駁巴士太多又會搶晒啲客，如果一個唔好彩空車入去，載番個短途客出嚟，油費都賺唔返，梗係耍手擰頭喇。
話時話，郵輪碼頭負面新聞不絕，蝦碌嘢多到天光都數唔完。每次打風例牌淪為「水世界」，沙包水桶輪番上陣抗洪唔在講，購物設施亦係差到冇朋友，宣傳嚴重不足，好多旅客根本聽都未聽過，購物區通道更加係九曲十三彎，血拼後更要拎住大袋細袋兜成五分鐘至出到去，唔知嘅仲以為玩緊迷宮添。你話嘞，咁搞法商舖有咩法子唔拍烏蠅吖。
即係咁，郵輪碼頭位處黃金地皮，飽覽維港無敵靚景，先天條件無話可說，只要經營得法，絕對有潛質發展成旅遊新地標。呢嗱，早排有人建議善用碼頭平台花園發展酒吧一條街，打造東九龍「啟德酒吧城」，證明真係大有可為o架。不過都係嗰句，官僚靠得住，豬乸會上樹，好好一個郵輪碼頭，落喺佢哋手上都變得烏煙瘴氣，亂七八糟。港府有本事化神奇為腐朽，真係唔到你唔服。
當然喇，郵輪碼頭問題只係本港旅遊業亂象嘅縮影咋。香港雖然係彈丸之地，但其實擁有豐富嘅旅遊資源，既有獨特自然景觀，又有傳統民俗節慶，又點止購物咁簡單吖。正所謂，天予弗取，反受其咎，港府有好嘢唔識用，搞到旅遊設施單調老化，景點嚟嚟去去三幅被，點發展旅遊經濟啊！